Nyarwaya Innocent ari mu byishimo bikomeye nyuma yo kongera kubona Yago tv Show YouTube channel ye yari imaze ibyumweru bigera kuri bibiri yarasibwe kuri uru rubuga rwa YouTube kubera abo yise abagambanyi bashatse ko asubira hasi ndetse ko bamwe ashobora kubajyana mu nkiko.
Ibi Yago yabitangarije mu kiganiro cye bwite yahise ashyiraho asobanura uko byagenze ndetse anashima benshi bamusengeye ndetse n’abamufashije kugarura iyi channel ye kuri ubu ikaba igaragara.
Mu marangamutima menshi, Yago yasobanuye uburyo yari amaze iminsi yarahangayitse kugeza ubwo atakaza ibiro bitanu, yibaza uburyo igikorwa cy’indashyikirwa yubatse mu myaka ibiri ishize kibaye impfabusa kubera abamugiriye ishyari bakamugambanira ku buyobozi bwa YouTube kugira ngo umuyoboro we ufungwe nyamara atabazi, ndetse bamurega ibinyoma.
Uyu muyoboro we wa YouTube agaragaza uburyo wari umubeshejeho, ko nta kandi kazi kamutunze afite, akerekana n’uburyo yawukoresheje agahindura ubuzima bwa benshi, ari na ho ahera agaragaza ko atari kwivanaho nk’uko bamwe babimushinje, kuko adashobora guhagarika nkana igikorwa kimuha imibereho ya buri munsi.
Mu butumwa yanditse ku mbuga nkoranyambaga, Nyarwaya yagize ati: “Nyuma y’ibyumweru 2 n’igice hafi 3 YAGO TV SHOW yongeye gusubira ku murongo. Ndashimira itsinda ry’abasore 3 bakoze ibishoboka bakaburana ibyo twaregwaga byose kugeza Channel igarutse. Ndashimira abantu mwese mwadusengeye cyane. Ntacyo nabona mbitura. Mwarakoze Cyane!”
Icyakora mu kiganiro yashyize kuri uyu muyoboro we, Yago yikomye abantu batatu ateruye ngo abavuge mu mazina, ariko avuga ko ari abanyamakuru kandi ko bahuriye ku bintu bisa n’ibyo atangaza kuri YouTube. Yavuze ko ubu yamaze kumenya neza abari babyihishe inyuma kubera amashyari.
Abo ngo ni bo bamutangiraga ibirego ku buyobozi bwa YouTube bamushinja ibinyoma, dore ko ibyo yabaga yatangaje byari mu Kinyarwanda, bityo ubuyobozi bwa YouTube ntibubashe kumenya niba ibyo aregwa ari ibinyoma.
Yago avuga ko afite amajwi n’ubutumwa ababiri inyuma bagiye bavuga bamwigambaho ko bazamucecekesha, kuko ari abantu bakomeye kandi atazi icyo bari cyo. Yavuze ko ashatse ubu yabajyana mu butabera kuko ibyo bamukoreye birimo ibyaha, ariko avuga ko nta nyungu afite mu kubashyira habi nk’aho bashatse kumushyira.
Icyakora kugeza na n’ubu hari abagitekereza ku kuri kw’ibivugwa na buri ruhande, bibaza uvugisha ukuri n’ubeshya, dore ko hari abakomeje gushidikanya kuko mu myidagaduro hakunze kugaragara ibyo bamwe bavuga babeshya bagamije kurushaho kuvugwa cyane no kwamamara, ibyo bita “gutwika”.
Umwe mu bo yagarutseho cyane ni umunyamakuru Phil Peter uherutse no kwandika ubutumwa burebure ku mbuga nkoranyambaga, asaba Yago kuvugisha ukuri kuko ngo ari we wikuriyeho ‘channel’ ye ku bushake, bigatuma hari abo abantu barimo kwibasira ‘bababeshyera’ nkuko twabibagejejeho muri iyi nkuru https://byoseonline.rw/umuriro-watse-hagati-ya-phil-peter-na-yago-bapfa-yagotv-show-yasibwe-kuri-youtube/
About The Author
