Nyuma y’umukino wari wahuje ikipe ya Rayon Sports na Gasogi United ukavugwaho ibintu byinshi bitandukanye aho Perezida w’ikipe ya Gasogi KNC yatangaje ko iyi kipe ayikuye muri shampiyona yo mu Rwanda KNC yamaze kwisubira kuri iki cyemezo yari yafashe.
Nyuma y’uwo mukino, Perezida wa Gasogi United yatangarije itangazamakuru ko ikipe ye ivuye muri shampiyona ndetse anavuga amagambo akomeye kuri FERWAFA aho yashinjaga komisiyo ishinzwe abasifuzi ko ari yo imugambanira abasifuzi bakamusifurira nabi, ibi ni ukubera igitego ikipe ya Gasogi yatsinze maze umusifuzi w’igitambaro akacyanga avuga ko barariye.
Aganira na Fine FM Perezida w’ikipe ya Gasogi United Kakooza Nkuriza Charles uzwi ku izina rya KNC yatangaje ko icyemezo cyo gukura ikipe ye muri shampiyona yagisubitse nyuma yo kuvugana n’abanyamategeko be ndetse n’izindi nyungu z’ikipe.
Abajijwe niba icyemezo yafashe cyo gukura ikipe ye muri shampiyona y’u Rwanda, KNC yasubije ati: ‘‘Maze gusuzuma no kuvugana n’abanyamategeko banjye ndetse n’abandi icyemezo nkikomeyeho ariko mutandukanye KNC na Gasogi United, ibaruwa tugiye kwandikira Ferwafa ni njyewe ku giti cyanjye utazongera kugaragara kuri sitade bivuze ngo nsezeye burundu ko uzambona kuri sitade azahankubitire”
KNC yakomeje avuga ko atafata icyemezo cyo gukura ikipe muri shampiyona kuko ngo hari abakinnyi batunzwe na yo bityo ko afashe icyo cyemezo yaba abahemukiye kuko ariho ubuzima bwabo bushingiye bityo ko atabikora ariko we akomeza ashimangira ko atazasubira kuri sitade ko azajya yumva umupira kuri radiyo cyangwa kuwureba kuri tereviziyo gusa azajya ajya kureba imyitozo ya Gasogi United.
Yakomeje abisubiramo atsindagira ati: “Njyewe Kakooza Nkuriza Charles mwene Murego sinzasubira kuri sitade”.
Yavuze ko azakomeza gufasha iyi kipe mu buryo ubwo ari bwo bwose ariko ko atazajya kuri sitade akaba avuga ko ari ukwirinda gushwana na FERWAFA. Ati:”Icyo ntashaka ni ukujya mu bibazo na federasiyo hari agatsiko ka mafiya kari muri fereration, umuntu arabavugaho bakigira Imana, ni bo bacurika byose, bica uwo bashatse, ibyongibyo njyewe ntabwo nshobora kubona ikintu ngo nkirebe nceceke”.
Yakomeje asaba perezida wa FERWAFA gufata icyemezo agakubura ari byo anavuga ko yazize kuvuga ngo bazabirukane.
Mu mukino wahuje Gasogi United na Rayon Sports warangiye Gasogi itsinzwe igitego kimwe ku busa nubwo iyi kipe yatsinze igitego kikangwa n’umusifuzi wo ku ruhande ari byo byakuruye impaka ndende.
About The Author
