Prostate ni agasabo gato gaherereye hafi y’uruhago, gafite inshingano yo kurekura amatembabuzi amwe aherekeza intanga ndetse no kuyabika.
Prostate ishobora gufatwa n’indwara zitandukanye. Harimo zimwe muri mikorobe umugabo ashobora kwandurira mu mibonano mpuzabitsina ,izindi mikorobe zikaba zitahandurira.
Urugero rw’indwara nka infection urinaire, Cancer, harimo kandi na mikorobe nk’iza mburugu zandura mu mibonano mpuzabitsina nazo zishobora kujya muri Prostate zikayitera uburwayi.
Iyo byagenze gutya, muri Prostate hakageramo uburwayi babyita prostatite.
Ubundi burwayi bushobora gufata Prostate bujyana n’uko umuntu agenda akura. Gusa, uko umuntu agenda akura niko Prostate nayo ishobora kugenda ikura ariko atari ku bantu bose.
Iyo imaze kuba nini rero nibwo itera ibibazo kuburyo ibuza inkari gusohoka.Ubu burwayi bw’uko Prostate iba nini ikabuza inkari gusohoka umugabo akamererwa nabi, bikaba ngombwa ko abagwa bwitwa Adenome de prostate.
Ibimenyetso byatuma ukeka ko ufite uburwayi bwa Prostate nk’uko tubikesha mayo clinic.org.
– Gushaka kujya kunyara kenshi mu ijoro.
– Kudashobora gutangira kunyara cyangwa guhagarika ubwo bushake mu gihe ugiye kunyara.
– Kunyara ukumva ziraza ari nke ugereranyije n’uko ubishaka. Cyangwa kunanirwa kurangiza kunyara ngo wumve zishizemo.
– Kumva umeze nk’uri gushya mu gihe uri kunyara.
– Kubona amaraso mu nkari.
– Kugira amaraso mu masohoro.
– Kugira ibibazo mu gihe cyo gusohora k’umugabo.
– Kugira uburibwe mu mayunguyungu, no mu gace k’umugongo ko hasi.
– Kugira uburibwe cyangwa uburyaryate haruguru y’igitsina n’impande zaho.
– Kubabara mu magufa yo mu mugongo wo hasi (iyi ndwara iba yakomeye cyane).
– Kugira ibibazo byo gufata umurego w’igitsina.
Abagabo bose, cyane cyane ariko abarengeje imyaka 60, bakwiye kwitondera ibi bimenyetso bivuzwe. Nubwo bwose ibi bimenyetso byose bitavuga indwara za Prostate kuko hari n’ibivuga indwara zo mu myanya ndangagitsina, ariko ubifite wese akwiye kwihutira kwisuzumisha.
About The Author
