Iminsi mirongo ine n’itanu 45 irashize Nshuti Divine Muheto atsindiye ikamba rya Nyampinga w’u Rwanda 2022 (Miss Rwanda 2022) ariko kugeza ubu uyu mukobwa akaba atari yahabwa kimwe mu bihembo nyamukuru bihabwa uwatsindiye ikamba rya Nyampinga w’u Rwanda ari cyo imodoka ya HyundaiVenue nkuko byari bisanzwe.
Benshi bakomeje kuvuga byinshi kuri uku kuba Muheto atari yahabwa imodoka ye bijyanye ndetse n’ibibazo biri mu bategura iri rushanwa aho Prince kid uhagarariye Rwanda Inspiration Backup itegura Miss Rwanda afungiwe kuri sitasiyo ya RIB y’i Remera aho akekwaho ibyaha by’ihohotera rishingiye ku gitsina byakorewe bamwe mu bakobwa bitabiriye iri rushanwa.
Bamwe batangiye gukeka ko kuba Miss Muheto atari yahabwa imodoka ye ko bishobora kuba bifitanye isano nabyo ariko kuri ubu uruganda rukora imodoka rwa Hyundai rusanzwe rutanga iyi modoka rwatangaje impamvu uyu mukobwa atari yahabwa imodoka ye.
Uru ruganda rwavuze ko kuba Miss Rwanda 2022 atari yabona imodoka ye ya HyundaiVenue byatewe n’imirimo yo gusana icyambu cya Mombasa byatumye imodoka itinda mu nzira bayizana mu Rwanda ariko ngo kugeza ubu isaha ku isaha nihagera bazamuhamagara bayimushikirize nkuko bisanzwe.
Ubusanzwe Miss Rwanda iyo amaze guhabwa ikamba ahita ajya no kwifotoreza mu modoka ye hanze ariko kuri ubu si ko byagenze kuko iyo modoka ntayo yari ihari byatumye benshi bibaza impamvu atayifotorejeho.
Uru ruganda rwavuze ko niramuka igeze mu Rwanda bazahamagara Miss Muheto aze atware imodoka ye.
About The Author
