Urubanza rwa Bagirishya Jean de Dieu wari Visi Perezida w’ishyirahamwe nyarwanda rya Volleyball (FRVB) rwari ruteganijwe kuburanishwa uyu munsi tariki ya 24 Ukuboza 2021 rwasubitswe rukaba rwimuriwe mu mwaka utaha wa 2022.
Jado Castar yakatiwe imyaka 2 y’igifungo n’Urukiko Rwisumbuye rwa Gasabo tariki ya 13 Ukwakira 2021 nyuma yo guhamwa n’icyaha cyo gukoresha impapuro mpimbano kugira ngo ashyire mu bikorwa inshingano ze.
Jado Castar akaba yahise ajuririra iki gihano yahawe, akaba yaragombaga gutangira kuburana mu bujurire tariki ya 6 Ukuboza ariko uru rubanza ruza gusubikwa nyuma y’uko umucamanza atabonetse.
Ubu bujurire bwari bwimuriwe uyu munsi tariki ya 24 Ukuboza 2021 ariko nabwo ntirwabaye bitewe n’uko abacamanza bagomba kuruburanisha bari mu mahugurwa, rukaba rwimuriwe tariki ya 28 Mutarama 2021.
Jado Castar yari asanzwe ari umunyamakuru ndetse akaba na nyir’igitangazamakuru cyitwa B&B FM, yari Visi perezida w’ishirahamwe nyarwanda rya Volley Ball.
Uyu mugabo ashinjwa kuba yarahimbye ibyangombwa byatumye hari abakinnyi bakomoka muri Brazil bakinira Ikipe y’Igihugu y’u Rwanda y’Abagore mu Gikombe cya Afurika cya Volleyball cyabereye i Kigali hagati ya tariki ya 10 n’iya 20 Nzeri 2021.
About The Author
