Isoko ry’igura n’igurisha mu Rwanda ritangiye kurema nyuma y’aho umwaka w’imikino uri kugana ku Musozo. Amakipe atandukanye arimo kugura ndetse andi arekuza abakinnyi, yaba abashoje amasezerano ndetse n’abagize umusaruro udahagije.
Rayon Sports nk’imwe mu makipe yatangiye gusinyisha abakinnyi hakiri kare, yatangiye kunyuza umweyo mu bari bahasanzwe aho kuri ubu yamaze gutandukana n’abakinnyi 5.
Kwizera Pierre wabaye Kapiteni w’iyi kipe mu myaka yatambutse, ari mu bakinnyi bamaze guhabwa icyemezo cy kwishakira ikipe. Uyu musore yari yagarutse muri Rayon Sports mu mikino ya shampiyona yo kwishyura muri uyu mwaka. Pierre waje muri Rayon Sports avuye muri As Kigali, asize akinnye imikino 13, irimo imikino 10 ya shampiyona ndetse n’imikino 3 y’igikombe cy’Amahoro ariko nta gitego yatsindiye iyi kipe.
Mael Dindjeke ukomoka muri Cameroun, nawe ntazakomezanya na Rayon Sports nyuma y’umusaruro udakanganye yagaragaje. Mu ntangiriro z’uyu mwaka, nibwo Mael Dindjeke yasinyiye ikipe ya Rayon Sports amasezeramo y’amezi 6 bivuze ko amasezerano ye yari ageze ku mpera. Uyu musore avuye muri Rayon Sports ayikiniye imikino 13, irimo 4 y’igikombe cy’Amahoro ndetse n’imikino 9 ya shampiyona akaba ayisigiye igitego kimwe.
Rutahizamu Sulleiman Sanogo urugendo rwe muri Rayon Sports rwashyizweho akadomo nyuma y’aho na we ahawe icyemezo cyo kwishakira ikipe.
Sanogo yageze muri Rayon Sports mu ntangiriro z’iyi shampiyona, aho yari yasinye amasezerano y’imyaka 2. Sanogo yibukirwa ku gitego yatsinze Musanze FC mu mukino wa gicuti, ubwo shampiyona yendaga gutangira. Umusaruro w’uyu musore ntabwo wari ukaze kuko agiye yari amaze gukina imikino 6 yose ya shampiyona, nta n’umwe akinnye mu gikombe cy’Amahoro ndetse akaba nta n’igitego yatsindiye iyi kipe.
Elo Manga Steve, rutahizamu ukomoka muri Cameroun ari mu bakinnyi Rayon Sports yasabye ko babyarana abo. Uyu mukinnyi yageze muri Rayon Sports mu ntangiriro za Shampiyona, ubwo yari aje gucyemura ikibazo cya ba rutahizamu. Uyu musore yakiniye Rayon Sports imikino 4 ya shampiyona, ayitsindira igitego twavuga nawe umusaruro utari ukakaye.
Umukinnyi twavuga ko yatunguye benshi ni Manace Mutatu, wari wageze muri Rayon Sports mu 2020. Uyu musore wari ushigaje umwaka, ntabwo yakunze kugaragara mu kibuga kubera ikibazo cy’imyitwarire. Yari umwe mu bakinnyi bari basigaye muri Rayon Sports basinyishijwe na Munyakazi Sadate.
Tariki 17 Kamena, nibwo Rayon Sports izasoza umwaka w’imikino isura Gasogi United ku mukino wa nyuma wa shampiyona, ushobora kuzakurikirwa n’ijyenda ry’abandi bakinnyi.
About The Author
