Umutoza mukuru w’ikipe ya Rayon Sports, Julien Mette yagaragaye afite umujinya w’umuranduranzuzi aho yawuturaga ibikoresho byose abonye.
Mu myitozo yo kuri uyu wa Gatanu tariki ya 8 Werurwe 2024 itegura umukino wo ku munsi w’ejo na APR FC, umutoza yagaragaye atishimye afite umujinya.
Ni imyitozo ubuyobozi bwari bwatumiyemo abanyamakuru ariko umutoza Jullien Mette yabasohoye shishi itabona avuga ko ubuyobozi butamumenyesheje ibyo gukorera imyitozo imbere y’abanyamakuru.
Mu Nzove hari umubare munini w’abanyamakuru basuye imyitozo banifuza kumenya icyo umutoza n’abakinnyi batekereza ku mukino w’ejo na APR FC.
Umutoza akihagera yahise abirukana ndetse ahamagara umwe mu bayobozi b’ikipe barashwana avuga ko atigeze amenyeshwa ibyo gukora imyitozo hari abanyamakuru.
Mu mashusho akomeje gusakara ku mbuga nkoranyamba, yerekana umutoza Julien Mette yinjira mu kibuga agatangira gushotagura ibintu ndetse anamena terefoni ye.
Ibyo yabikoze nyuma yo gushyamirana n’abayobozi be bamukuriye. Ubwo ibyo byabaga abakinnyi bari bumiwe.
Rayon Sports irakina na APR FC ku munsi w’ejo tariki ya 9 Werurwe 2024 kuri Pele Stadium saa Cyenda z’amanywa.
About The Author
