Imyambarire y’Umutoza wa Rayon Sports, Haringingo Francis, yavugishije benshi nyuma y’uko yaje ku mukino batsinzwemo na APR FC igitego 1-0 ku wa Gatandatu, yambaye ipantalo imufashe ndetse itageze hasi ku birenge.
Uyu mugabo ukomoka mu Burundi, ni umwe mu batoza bazwiho kwambara neza muri shampiyona y’icyiciro cya mbere mu Rwanda.
Nubwo bimeze bityo ariko, imyambarire ye ku mukino Rayon Sports yatsinzwemo na APR FC, yavugishije benshi barimo abari ku kibuga ndetse no ku mbuga nkoranyambaga.
Haringingo Francis Christian yaje kuri uyu mukino yambaye ikoti rya ’chocolat’, ishati y’umweru n’ipantalo y’ikoboyi imwegereye cyane ariko itagera hasi ku birenge.
Iyi pantalo ni yo yavugishije abatari bake kuko hari abavuze ko “kubera igitutu cy’umukino, umutoza wa Rayon Sports yambaye ipantalo y’umwana we.“
Ubwo yari abajijwe kuri iyi myambarire nyuma y’umukino, Haringingo yavuze ko ku kibuga ari ho akorera akazi ke ndetse yagerageje kwambara neza mu buryo bugezweho.
Ati “Uyu ni umukino, aha ndi ni mu biro byanjye. Nanjye mba ngomba kuza nambaye. Uru ni urubanza mu zindi, umuntu aragerageza akazi kanjye akagasonera nk’uko namwe mubibona ni ko katubeshejeho, ni ko kazi dukora. Nibaza y’uko ni na byiza mu myitwarire kugira ngo ushobore guhagararira ikipe yawe usa neza, wambaye neza.”
Yakomeje agira ati “Bijyana n’igihe, iterambere, ni ’style’ ziba ziharawe, zigezweho.”
About The Author
