Umutoza w’ikipe ya Rayon Sports Jorge Paixão n’umwungiriza we Daniel Faria bagaragaye bari gusabana n’abana ndetse banasangira amafunguro bituma benshi bakomeza kumushimira umutima mwiza wo gufasha afite.
Ni ifoto yaciciknye ku mbuga nkoranyambaga mu gitondo cyo kuri uyu wa Gatanu 27 Gicurasi 2022 aho aba batoza b’Ikipe ya Rayon Sports bagaragaye barimo basangira n’abana bigaragara ko ari abanyeshuri bitewe n’imyambaro bari bambaye.
Bwa mbere iyi foto yashyizwe hanze n’uyu mutoza abinyujije ku rukuta rwe rwa Instagram aho yaherekejwe n’amagambo agira ati “Mu buzima guha abandi ibyishimo ni cyo kintu cyiza twakishimira. Ntacyo bivuze niba uri umukire cyangwa umukene, uri umuzungu cyangwa umwirabura. Imitima yacu ni imwe. Ruhago warakoze kumpa ibi bihe by’agatangaza. “
Iki gikorwa cyishimiwe na benshi mu bakunzi ba ruhago batandukanye hano mu Rwa aho bagendaga bamushimira. Uyu mutoza akunze kugaragara ari gufasha abana batandukanye.
Ibi kandi bishimangirwa nuko ari kenshi yagiye arebera imikino itandukanye yicaye mu myanya y’abafana basanzwe aho kujya kwicara ahiyubashye hazwi nko muri VIP. Uyu mutoza kandi yigeze no kugaragara ari kurebera umukino hanze y’ikibuga yanze kwishyura amafaranga yo kwinjira.
Abajijwe ku kuba yanga kwishura ngo arebe umukino yicaye muri sitade, Uyu mutoza yatangaje ko aba afite abana benshi hano hanze aba akwiriye kwitaho aho kujya gutanga amafaranga ye ku mupira.
About The Author
