Inzego zibishinzwe mu Rwanda zasabwe kugaragaza aho umunyamakuru Theoneste Nsengimana wa Umubavu tv aherereye nyuma y’aho umuryango we uvuga ko bamaze iminsi bajya kumusura muri gereza afungiwemo, bakamubura.
Umuryango we ukeka ko intandaro yo kutamubona yaba ari baruwa yashyizweho umukono n’uyu munyamakuru bigaragara ko yandikiye ubuyobozi bwa gereza ya Nyarugenge aho afungiwe.
Muri iyi baruwa ngo yasabaga uruhushya rwo kujya gukusanya imikono y’abamushyigikira, kugirango atange kandidatire ku mwanya w’umukuru w’igihugu mu matora yo muri Nyakanga? Ese umuntu ufunzwe wanafunzwe igihe kirenze amezi 6 yemerewe kwiyamamaza?
Umugore wa Nsengimana witwa Chantal Umwali yabwiye Ijwi ry’Amerika ko iyo baruwa igaragara ku rupapuro rwo mu ikayi ntoya y’utuzu n’umukono w’ikaramu y’ubururu ari umwimerere.
Yavuze ko umugabo we yari yanditse amabaruwa abiri: imwe yageneye gereza n’iyo yahaye umugore we. Gusa agashimangira ko iyo yageneye gereza yahise iyirigisa.
Umugore wa Nsengimana yanandikiye minisiteri y’ubutabera n’izindi nzego bakorana indi baruwa asaba ko umugabo we yarenganurwa. Muri iyi baruwa yanditse mu kwezi gushize kwa Gatanu, avuga ko kumufungira umugabo mu gihe gisaga imyaka ibiri hatagaragazwa ibyo aregwa ngo abashe kubyireguraho byamugizeho ingaruka zikomeye.
Ubwo Ijwi ry’Amerika ryageragezaga kuvugisha Therese Kubwimana uvugira urwego rw’amagereza mu Rwanda, ntiyitabye telefone ndetse ntiyanasubije ubutumwa bugufi yohererejwe ku rubuga rwa WhatsApp.
Umwali avuga ko yabwiwe n’ubuyobozi bw’amagereza ko umugabo we hari ibindi bihano arimo muri gereza, ko azamubona ari uko abirangije.
Theoneste Nsengimana ni umuyobozi w’ikinyamakuru Umubavu.com cyo kuri murandasi ndetse na Umubavu TV Online yo ku muyoboro wa YouTube. Yatawe muri yombi ashinjwa gutangaza impuha no kuba mu mutwe w’abagizi ba nabi.
About The Author
