Umunyamakuru Sandrine Isheja uri mu bafite izina rikomeye mu myidagaduro y’u Rwanda yinjiye mu mukino wo gusiganwa mu modoka, akaba umwe mu bategerejwe mu isiganwa rya ‘Sprint Rally’ ritegerejwe ku wa 30 Werurwe 2024.
Yoto Fabrice winjije Sandrine Isheja mu mukino w’isiganwa ry’imodoka, yabwiye Igihe ko uyu munyamakuru amaze igihe yitoza ndetse abazitabira ‘Sprint Rally’ itegerejwe ku wa 30 Werurwe 2024 bazamubona.
Sandrine Isheja yinjiye muri uyu mukino nk’uzaba afasha Yoto Fabrice uzaba ari umushoferi, icyakora bo ntabwo bazaba bari guhatana ahubwo bazagenda imbere y’imodoka ziri kurushanwa ibizwi nka ‘Zero car’.
Yoto Fabrice yavuze ko nubwo bazaba batari kurushanwa hari icyizere ko hari amarushanwa azakinana na Sandrine Isheja uyu mwaka, cyane ko yamaze kwinjira muri uyu mukino kandi amaze igihe yihugura.
Sandrine Isheja winjiye muri uyu mukino afasha umushoferi, agiye kwiyongera kuri Kalimpinya Queen nawe uri mu bafite izina mu myidagaduro ariko unamaze kuryubaka muri uyu mukino.
Kalimpinya umaze kurenga ibyo gufasha abashoferi, kuri ubu nawe asigaye atwara ndetse ni umwe mu bazasiganwa muri ‘Sprint Rally’ itegerejwe ku wa 30 Werurwe 2024.
About The Author
