Urwego rw’Igihugu rw’Ubugenzacyaha rwatangaje ko rwataye muri yombi umukinnyi w’ikipe yo mu kiciro cya mbere Etoile de l’Est witwa Okenge Lulu Kevin azira kwiba televiziyo n’imyenda.
Tariki ya 17 Werurwe 2022, nibwo Urwego rw’Igihugu rw’Ubugenzacyaha rwataye muri yombi uyu mukinnyi ukurikiranyweho kwiba televiziyo ndetse n’imyenda y’umutoza Banamwana Camarade babanaga mu nzu mu Karere ka Gicumbi.
Umuvugizi wa RIB, Dr. Murangira Thierry, yabwiye Igihe ko ukurikiranywe yemeye icyaha, akavuga ko yahisemo kwiyishyura ibyo bikoresho kuko na Banamwana hari amafaranga yari amurimo.
Ni ubujura bwabereye mu Karere ka Gicumbi, Umurenge wa Byumba, Akagari ka Nyarutarama, Umudugudu wa Mucyeri. Mu gihe uwafashwe ubu afungiye kuri sitasiyo ya RIB ya Byumba mu gihe akiri gukorerwa dosiye ngo ishyikirizwe Ubushinjacyaha.
Kwiba ni icyaha gihanwa n’ingingo ya 166 y’itegeko nimero 068/2018 ryo ku wa 30 Kanama 2018 riteganya ibyaha n’ibihano muri Rusange.
Ugihamijwe n’Urukiko ahanishwa Igifungo kitari munsi y’umwaka ariko kitarenze imyaka ibiri, n’amafaranga atari munsi ya miliyoni 1 Frw na miliyoni 2 Frw ariko atarenze miliyoni 2 Frw cyangwa imirimo y’inyungu rusange cyangwa kimwe muri ibi bihano.
About The Author
