Umunya-Uganda Taddeo Lwanga wahoze akinira Simba Sports Club yo mu gihugu cya Tanzania, yabaye umunyamahanga wa mbere wageze i Kigali aje gukinira APR FC.
Ni nyuma y’imyaka 11 iyi kipe y’Ingabo z’Igihugu yarafashe gahunda yo kuba ishyize ku ruhande gahunda yo gukinisha abakinnyi bakomoka mu mahanga.
Radio Fine FM yatangaje ko uyu mukaseri uri mu beza akarere ka Afurika y’Iburasirazuba gafite yageze i Kigali mu ma saa yine zo kuri uyu wa Kabiri tariki ya 04 Nyakanga 2022.
Taddeo Lwanga yari amaze umwaka umwe akina muri Arta/Solar7 yo muri Djibouti yagezemo mu mwaka ushize avuye muri Simba.
Mbere y’aho yari yarakiniye amakipe arimo Express FC, Villa Sports Club na Vipers yose y’iwabo muri Uganda, cyo kimwe na Tanta Sports Club yo mu Misiri.
Umunyamakuru Samuel Karenzi yatangaje ko Lwanga akigera i Kanombe yahise atwarwa n’imodoka “ifite ibirahure by’ijimye itanagira plaque”, mbere yo kumujyana ahantu hataramenyekana byitezwe ko ari buhurire n’abayobozi ba APR FC.
Uyu munyamakuru yagaragaje urwandiko rw’ubutumire Nyamukandagira yoherereje uriya mukinnyi imusaba kuza kuyisinyamo amasezerano, ndetse n’itike y’indege yamwoherereje mbere yo guhaguruka i Kampala.
Yagaragaje kandi ifoto ya Lwanga yafashwe mu gitondo cyo kuri uyu wa Kabiri yicaye ku kibuga cy’indege mpuzamahanga cya Entebbe i Kampala yitegura kurira rutemikirere yamuzanye i Kigali.
Biteganyijwe ko uyu musore w’imyaka 29 y’amavuko agomba kubanza gukora ikizamini cy’ubuzima, mbere yo gusinya amasezerano nk’umukinnyi mushya wa APR FC.
About The Author
