Amashimwe ni yose ku muryango wa Mukayizere Jalia Nelly ukoresha izina rya Kecapu muri sinema, nyuma y’uko yibarutse abana batatu icyarimwe bakaba ubuheta bwe.
Mu kiganiro kigufi yahaye ikinyamakuru igihe Kecapu yahishuye ko yibarutse mu gitondo cyo kuri uyu wa 14 Mata 2023, abyara abana batatu barimo abahungu babiri n’umukobwa umwe.
Uyu mubyeyi wabyariye mu bitaro by’ahazwi nko kwa Nyirinkwaya mu Mujyi wa Kigali yavuze ko yaba we ndetse n’abana bameze neza ndetse bari kwitabwaho n’abaganga.
Kecapu yibarutse nyuma y’igihe akoze ubukwe n’umugabo we Jean Luc bashyingiranywe mu mpeshyi ya 2022.
Mu kiganiro yagiranye n’ikinyamakuru igihe.com mu minsi ishize, Kecapu yagize ati “Ni umusore twamenyanye mu 2009, mu 2010 twari dutangiye gukundana ariko urumva twari tukiri abana. Byagiye bitugora tukaburana ubundi tugahura ariko uyu munsi ni we turi gukundana kandi rwose sinabahisha ko tumeranye neza.”
Ubusanzwe Kecapu ni umukinnyi wa filime wabigize umwuga ugezweho mu yitwa ‘Bamenya’ itambuka kuri YouTube.
About The Author
