2nd Lt Ian Kagame, umusirikare akaba n’umuhungu wa Perezida Kagame yagaragaye mu ikipe ya APR BBC yaraye itsinzwe na Patriots BBC mu mukino wa shampiyona.
Ni umukino wabereye muri LDK, Patriots iza kwitwara neza iwutsinda ku manota 67-60 ya APR BBC.
APR BBC yitwaye neza itsinda agace ka mbere ku manota 23-16, gusa Patriots BBC yaje yariye amavubi mu gace ka kabiri igatsinda amanota 23-9. Bagiye kuruhuka ari 39 ya Patriots kuri 32 ya APR BBC.
Agace ka gatatu APR BBC yagatsinze ku manota 16 kuri 11, mu gihe yumvaga n’amanota 2 asigayemo iri buze kuyakuramo ntibyaje kuyorohera kuko yatsinzwe agace ka nyuma ku manota 17-12 maze umukino urangira ari amanota 67 ya Patriots BBC kuri 60 ya APR BBC.
Muri uyu mukino benshi baje gutungurwa no kubona umuhungu wa Perezida Kagame, 2nd Lt Kigenza Ian Kagame yishyushyanya n’abakinnyi ba APR BBC.
Nyuma byaje kugaragara ko atari ukwishyushya gusa ahubwo ari n’umukinnyi wa APR BBC kuko yari yasohotse ku rutonde rw’abakinnyi iyi kipe iri bukinishe nubwo ataje kugira amahirwe yo kujya mu kibuga ngo yiyereke abakunzi be.
About The Author
