Nyuma y’umukino wa gicuti APR FC yatsinzemo Marines FC ibitego 3-1 kuri uyu wa Gatatu, tariki 2 Kanama 2023, Umufana wa APR FC yinjiye mu kibuga ashaka guhobera Umunya-Sudani Sharaf Eldin Shaiboub Ali, ariko akumirwa n’abashinzwe umutekano.
Ubwo uyu mukino wari urangiye kuri Kigali Pelé Stadium, abakinnyi b’Ikipe y’Ingabo z’Igihugu bakomeje kwishyushya bazenguruka ikibuga biruka byoroheje. Ibi babikoze bakuyemo inkweto nk’uko babisabwe n’Umutoza wongera Imbaraga Adel Zrane.
Ubwo bazengurukaga ikibuga bageze ku nshuro ya kane, umwe mu bafana ba APR FC bari bakomeje kuririmba izina Shaiboub yacunze abakinnyi bageze iruhande rw’uruzitiro rwari rurinzwe n’abashinzwe umutekano maze abaca mu rihumye yinjira mu itsinda ry’abakinnyi ahobera Sharaf Eldin Shaiboub Ali Shaiboub.
Abari bashinzwe umutekano ku kibuga bahise bahagera bamukuramo ndetse na Polisi irahagoboka bamusubiza mu bafana asubirayo yishimye nyuma yo kugera ku ntego ze.
Itsinda ry’abafana yari arimo nyuma yo kurigarukamo ryamuteruye kuko yakoze ibyananiye abandi.
Ibyakozwe n’uyu mufana bisanzwe bimenyerewe i Burayi aho abafana bagerageza guca mu rihumye abashinzwe umutekano bashaka kujya gusuhuza abakinnyi b’ibirangirire. mu Rwanda ntibikunze kubaho kubona umufana ushamadukira gukora no kwifotoreza ku bakinnyi kugeza n’aho areba ku jisho abacunga umutekano ku kibuga akiruka abasanga.
Abafana ba APR FC bishimiye imyitwarire y’abakinnyi bashya nyuma yo kwitwara neza ku mukino wa mbere wa gicuti mu gihe bategereje uwa kabiri Ikipe y’Ingabo z’Igihugu izakinamo na Kiyovu Sports ku wa Gatandatu, tariki 5 Kanama 2023, kuri Stade ya Bugesera.
Nyuma yo kwegukana Igikombe cya Shampiyona y’umwaka ushize, APR FC izahagararira u Rwanda mu marushanwa Nyafurika ya CAF Champions league umwaka utaha aho yatomboye Gaadiidka FC muri Somalia mu ijonjora rya mbere. Iramutse ikomeje ikazahura na Pyramids FC yo mu Misiri.
About The Author
