Ubwato bwitwa ’MV Merda’ bwari butwaye abantu barenga 100 kuri uyu wa 3 Ukwakira 2024, bwarohamye mu kiyaga cya Kivu ku ruhande ruherera muri Repubulika Iharanira Demokarasi ya Congo.
Ubu bwato bwavaga mu gace ka Minova gaherereye muri teritwari Kalehe mu ntara ya Kivu y’Amajyepfo, bwerekeza mu mujyi wa Goma, Bwarohamiye mu gace ka Mukwidja.
Amashusho yafashwe agaragaza burohama gake gake kugeza ubwo bwose bucuramye, bukarengerwa n’amazi. Ku rundi ruhande, hagaragara abagenzi bake bageragezaga koga, berekeza ku nkombe z’ikiyaga.
Guverineri w’Intara ya Kivu y’Amajyepfo, Jean-Jacques Purusi yagaragaje ko iyi mpanuka yatewe n’uko ubu bwato bwari butwaye abarenze ubushobozi bwabwo kuko bwakabaye butwara abagenzi batarenze 30.
Yagize ati: “Ubwato bwavaga muri Minova bujya i Goma bwarohamiye mu kiyaga cya Kivu [bugeze] mu gace ka Mukwidja muri teritwari ya Kalehe. Bwari butwaye abantu barenga 100, nyamara bufite ubushobozi bwo gutwara abagenzi bagera kuri 30.”
Guverineri Purusi yatangaje ko hataramenyekana abantu bapfiriye muri iyi mpanuka n’abayirokotse.
Ati “Ntabwo dufite imibare irambuye, ariko bivugwa ko hari abapfuye n’abarokotse.”
Umuryango wa Afurika y’amajyepfo, SADC, watangaje ko abasirikare bari mu butumwa bw’amahoro bwawo mu burasirazuba bwa RDC, batanze ubufasha mu gutabara abarohamye mu kiyaga cya Kivu.
Guverineri Purusi yagaragaje ko abasare, Polisi ishinzwe umutekano wo ku nkombe z’ikiyaga ndetse n’abandi bafite aho bahurira n’ubwikorezi bukorerwa muri iki kiyaga bafite uruhare muri iyi mpanuka.
Yatangaje ko hagiye kuba inama y’umutekano yihutirwa ku rwego rwa Kivu y’Amajyepfo, yiga kuri iyi mpanuka, ateguza ko abayigizemo uruhare bose bagomba kubiryozwa.
As part of the #SAMIDRC Mandate, the #SAMIDRC Force Maritime continues to cooperate with the Security Forces of DRC to ensure the security and Protection of Civilians in Lake Kivu, North Kivu, Goma.#SAMIDRC Force Maritime collaborated with the DRC Army Navy (FARDC Navy) in the… pic.twitter.com/rT5dQnCxbY
— SADC Secretariat (@SADC_News) October 3, 2024
About The Author
