Umuvugizi wa Perezida w’Uburundi, Evelyne Butoyi, yatangaje ko Leta ititeguye gufungura imipaka gihana n’u Rwanda mu gihe rwaba rutararekura abashatse guhirika ubutegetsi mu 2015.
Butoyi ibi yabivugiye mu kiganiro abavugizi b’inzego nkuru z’igihugu bahaye abanyamakuru n’abanyagihugu kuwa Gatanu tariki 25 Werurwe 2022 mu Ntara ya Rutana.
Yavuze ko n’ubwo bigaragara ko urugendo rukiri rure, hakiri icyizere hagendewe ku butumwa bw’ibanga Perezida Kagame w’ u Rwanda yoherereje mugenzi we w’ u Burundi, Ndayishimiye Evariste ndetse n’izindi ntumwa z’ u Burundi zagiye mu Rwanda mu mezi abiri ashize. Yemeza ko ibiganiro bigeze kure.
Yagize ati “ Muri rusange muzi ko imibanire hagati y’ u Rwanda n’ u Burundi yajemo agatotsi. Aho bigeze, abakuru b’ibihugu byombi bari gukora ibishoboka ngo umubano wongere ube mwiza.”
Ku ngingo yo gufungura imipaka, Butoyi ati “ Mu Rwanda bwamaze gutera intambwe rufungura imipaka bitewe n’aho icyorezo cya Coronavirus kigeze. Murabizi ko hari abateye u Burundi mu 2015 bari mu Rwanda kandi ntibyanejeje u Burundi.”
Butoyi yemeza ko u Burundi bwifuza kongera kubana neza n’ u Rwanda.
N’ ubwo ibihugu byombi bikomeje kugaragaza ubushake bwo kongera kubana neza, kuva mu 2015, birebana ay’ingwe bitewe n’ u Burundi buvuga ko u Rwanda rwari inyuma y’abashatse guhirika ubutegetsi mu 2015. Ibi birego u Rwanda rwabiteye utwatsi, narwo ahubwo ruvuga ko u Burundi bukorana n’abashaka kurugabaho ibitero, iki gihugu nacyo kirabigarama.
About The Author
