Perezida wa Gasogi United, Kakoza Nkuriza Charles (KNC), yavuze ko iyi kipe itajya itsindwa umukino ufungura Shampiyona, bityo uwo izahuramo na Rayon Sports ku wa 18 Kanama, uzerekanirwamo ubwambure bwa Gikunduro.
KNC yabivuze nyuma y’umukino wa gicuti Gasogi United yatsinzemo Sunrise FC igitego 1-0 i Nyagatare ku wa Gatatu, tariki ya 9 Kanama 2023.
Ubwo yari abajijwe uko ikipe ye yiteguye umukino wa mbere wa Shampiyona azakiramo Rayon Sports ku wa Gatanu, tariki ya 18 Kanama, KNC yavuze ko mu mateka ya Gasogi United itajya itsindwa umukino wa mbere.
Yongeyeho ko uwo munsi ari bwo abantu bazabona isura nyayo ya Rayon Sports kuko ubundi yihinduranyaga mu maso y’abayireba.
Ati “Mu mateka yacu ntabwo turatsindwa umukino wa mbere. Iyo Rayon Sports twigeze guhura na yo dufite ikipe yari ivuye mu Cyiciro cya Kabiri, ariko ntekereza y’uko yagiye irira.”
Yakomeje agira ati “Ahubwo ikimbabaje ni kimwe, ni uko mugiye kubona ubwambure bwa Rayon Sports. Ubundi yabashukaga. Tugiye kuyambura ubusa ku karubanda, muyirebe. Ubu yifitemo ibibara byinshi, irabashuka. Turashaka kuyibereka neza muyibona.”
Uyu muyobozi wa Gasogi United yongeye ko Shampiyona itaha izaba ikomeye bitewe n’uburyo amakipe hafi ya yose yiyubatse.
Ati “Abantu birinde iyi Sunrise FC, ishobora kuzatanga akazi. Ifitemo abakinnyi beza. Shampiyona izakomera, nabonye Police FC, yitonde, iyi Sunrise ishobora kuyinywesha amazi.”
Gasogi United yaherukaga guhura na Rayon Sports mu mukino ufungura Shampiyona mu Ukwakira 2019, ubwo yari ivuye mu Cyiciro cya Kabiri naho Gikundiro ifite Igikombe cya Shampiyona cyaherukaga, zombi zinganya ubusa ku busa kuri Stade Amahoro mu mukino winjijweho miliyoni 19 Frw.
Kuva icyo gihe, amakipe yombi amaze guhura mu mikino itandatu, Gasogi United itsindamo umwe, Rayon Sports itsinda ine mu gihe zombi zanganyije inshuro eshatu.
Mu mwaka w’imikino ushize, Gasogi United yatsinze umukino ubanza ku gitego 1-0, Rayon Sports itsinda uwo kwishyura ku bitego 2-1.
About The Author
