Chrismar Malta Soares, rutahizamu wakiniraga ikipe ya Varingha FC, ategerejwe muri Rayon Sports muri iki cyumweru dore ko ubu yamaze gufata rutemikirere yerekeza mu Rwanda ava i Rio de Janeiro.
Uyu mukinnyi aba Rayon batezeho ibitego bitabarika yahagurutse muri Brésil mu ijoro ryakereye, kuri uyu wa Kabiri, aho ategerejwe i Kigali ku wa Gatatu azanywe n’indege ya Ethiopian Airlines.
Uyu mukinnyi w’imyaka 22, yakiniraga Varingha FC yari amazemo umwaka umwe nyuma yo kuva muri Grêmio Mauaense yo muri iki gihugu cya Brazil.
Andi makipe yakiniye arimo SE Patrocinense, FF Sports, Trindade na União Suzano yakiniye imyaka ibiri kuva mu mwaka w’imikino wa 2013/14.
Umutoza wa Rayon Sports, Masudi Djuma, aherutse kuvuga ko ageze kuri 80% yubaka ikipe azakinisha mu mwaka utaha w’imikino yanatangaje kandi ko asigaje imyanya itatu kuyiguriramo abakinnyi gusa yirinda gutangaza abo aribo.
Nizigiyimana Karim ‘Mackenzie’ amaze iminsi akora imyitozo muri iyi kipe ashobora kongera gukinira ndetse byitezwe ko we na Muhire Kevin bari mu bazasinya mu minsi ya vuba.
Abandi bavuzwe muri iyi kipe ni umunyezamu Kwizera Olivier ndetse na rutahizamu w’Umunya-Côte d’Ivoire, Bi Marc Boue, ukinira Mogadishu City Club yo muri Somalia.
Mu bakinnyi bashya Rayon Sports iheruka kugura harimo umunyezamu Hategekimana Bonheur wavuye muri Espoir FC, Rharb Youssef na Ayoub Ait Lahssaine bavuye muri Raja Casablanca, Essombe Willy Onana, Souleyman Sanogo na Mitima Isaac.
About The Author
