Rutahizamu wa Musanze FC, Umunya-Ghana Peter Agblevor, yavuze ko impamvu ahora atsinda Rayon Sports ari uko iyi kipe yamwanze ubwo yayikoragamo igeragezwa, bityo yiyemeza ko uko bahuye azajya ayereka ko yibeshye.
Ku Cyumweru tariki 15 Ukwakira 2023, Peter Agblevor yafashije Musanze FC gutsinda Rayon Sports igitego 1-0 cyabonetse ku munota wa 50.
Ni ku nshuro ya kabiri uyu rutahizamu yari abikoze kuko mu mwaka w’imikino ushize na bwo yayitsinze igitego ubwo Musanze FC yatsindaga Gikundiro ibitego 2-1.
Nyuma y’umukino, IGIHE yaganiriye n’uyu rutahizamu w’Umunya-Ghana ayitangariza ko impamvu ahora atsinda Rayon Sports ari uko yamwanze ubwo yajyaga mu igeragezwa.
Ati “Inshuro ya mbere nza mu Rwanda nagiye muri Rayon Sports gukora igeragezwa bambwira ko ntari umukinnyi mwiza. Buri gihe rero uko duhuye mba nshaka kuberaka ko bibeshye.”
Yakomeje agira ati “Oya ntabwo ari inzika ahubwo buriya niba udashimye umuntu wimubwira ko atari mwiza, muhe amahirwe agerageze kukwereka icyo ashoboye.”
Peter yakomeje avuga ko yakwishimira gukina muri Rayon Sports.
Ati “Yego ndacyafite inzozi zo gukinira Rayon Sports kuko ni ikipe ikomeye buri mukinnyi bifuza.”
Mu mwaka w’imikino wa 2021/22 ni bwo Peter Agblevor yageze mu Rwanda ajya gukora igeragezwa muri Murera ariko ntiyamushima. Icyo gihe yahise ajya muri Etoile de l’Est, yavuyemo ajya muri Musanze FC yasinyiye imyaka ibiri, ubu akaba ari mu mwaka we wa nyuma w’amasezerano.
Kugeza ubu, ku Munsi wa Karindwi wa Shampiyona, Peter ni we rutahizamu uyoboye abandi aho amaze gutsinda ibitego bitanu, akurikiwe na Inemesit Sunday wa Etoile de l’Est ufite bine.
About The Author
