Umunyarwanda Noam Emeran ukinira Manchester United yo mu Bwongereza, ari i Kigali aho yaje gusura umuryango we. Uyu musore ukina asatira izamu asanzwe ari umuhungu wa Nkusi Fritz Emeran wahoze ari myugariro w’ikipe y’igihugu ’Amavubi’.
Kuri uyu wa kabiri ni bwo uyu musore w’imyaka 19 yageze i Kigali, aho yaje kuruhukira no gusura abarangajwe imbere na nyina umubyara. Uyu musore ukina asatira izamu yemeje ko ari i Kigali binyuze mu ifoto bigaragara ko yafatiye ku Kacyiru yashyize ku mbuga nkoranyambaga ze.
Noam Emeran muri 2019 ni bwo yashyize umukono ku masezerano yo gukinira ikipe ya Manchester United, gusa ntiyabona umwanya uhagije wo gukina kubera ibibazo by’imvune. Nko mu mwaka w’imikino ushize yakiniye Manchester United umukino umwe wonyine muri shampiyona y’abatarengeje imyaka 23.
Uwari umutoza wa Manchester United, Ole Gunnar Solskjaer, yamusinyishije mu myaka itatu ishize amukuye mu kipe ya Amiens yo mu Bufaransa, igihugu umuryango we usanzwe utuyemo.
Uyu musore yifuzwa n’ikipe y’Igihugu ’Amavubi’, gusa ntarafata umwanzuro niba azakinira u Rwanda cyangwa u Bufaransa.
About The Author
