Ku mugoroba wo kuri uyu wa Gatanu tariki 27 Gicurasi, 2022 inkuba yakubise umwana w’imyaka 8 wo mu Murenge wa Nzahaha, abanda bana babiri bagira ihungabana.
Mu ma saa kumi n’imwe z’ikigoroba ni bwo inkuba yakubise Igiraneza Esther wari ufite imyaka 8 y’amavuko yigaga mu mwaka wa kabiri w’amashuri abanza agahita ahasiga ubuzima. Undi mwana witwa Ntibaziyaremye Erneste w’imyaka 10 y’amavuko na Manirafasha Antoinette w’imyaka 3 w’umuturanyi bahungabanyijwe n’iyi nkuba bajyanwa mu Bitaro bya Mibirizi.
Ibyago byabaye aba bana bageze mu rugo bavuye ku ishuri mu Mudugudu wa Rukoro, mu Kagari ka Rebero, mu Murenge Nzahaha. Umwana witabye Imana ni uwo mu rugo rwa Sebakungu Jonas.
Rwango Jean de Dieu, Umunyambanga Nshingwabikorwa w’Umurenge wa Nzahaha yavuze ko ibyo byago byabaye, asaba abaturage kubahiriza amabwiriza yo kwirinda inkuba, harimo kutugama imvura munsi y’ibiti, cyangwa kujya mu mazi imvura iri kugwa.
Ati ”Imvura itari nyinshi yagwaga, byabaye sa kumi n’imwe. Bari mu rugo umwana umwe wigaga mu mashuri abanza ahita yitaba Imana abandi twabajyanye mu Bitaro. Turahumuriza imiryango y’abagize ibyago, turasaba abaturage nubwo biba bitunguranye kwirinda ikiza cy’inkuba.”
Uyu muyobizi yakomeje avuga ko atari ubwa mbere muri uyu Murenge inkuba ikubita abaturage, ngo no mu munsi ishize byarahabaye ikubita abantu 26 ku bw’amahirwe ntawahasize ubuzima. Abana babiri bahungabanyijwe n’inkuba bahise bajyanwa ku bitaro bya Mibirizi aho bari kwitabwaho n’Abaganga.
About The Author
