Mu mukino wari ukomeye cyane witabiriwe na Perezida Paul Kagame, ikipe ya REG BBC yananiwe gukora ibyo abanyarwanda bayifuzagaho isezererwa muri 1/4 cy’irushanwa rya BAL 2022 itsinzwe na FAP yo muri Cameroon amanota 66-63.
Uyu mukino w’injyanamuntu wari witabiriwe n’abayobozi bakomeye muri guverinoma y’u Rwanda ndetse n’abayobozi bakomeye muri Basketball yaba iya Afurika ndetse no ku Isi warangiye REG BBC isezerewe itarenze umutaru.
REG BBC yari imbere y’abakunzi bayo ifite umurindi mwinshi w’abafana, ntabwo yarangiye neza kuko yatsinzwe agace ka mbere ku manota 23-17. Abakinnyi barimo Cleverand bagerageje gukora ibishoboka byose muri aka gace kuko yatsinzemo amanota 12, mu gihe Ndizeye Dieudonne yatsinzemo amanota 3.
REG BBC yagarutse mu gace ka kabiri igaragaza imbaraga zo gutsinda ikajya imbere ya FAP ariko uburyo bw’amanota bagerageje ntibwabahiriye. Abakinnyi barimo Axel Mpoyo, Nshobozwabyosenumukiza na Walker bagerageje gukora ibishoboka byose ariko biranga, igice cya mbere Cy’umukino kirangira REG BBC ishyizwemo ikinyuranyo cy’amanota 5, itsinzwe amanota 36-31.
Mu gace ka gatatu REG BBC yananiwe gukuramo ikinyuranyo yari yashyizwemo na FAP kuko cyiyongereyeho amanota abiri kiba amanota 7.
REG BBC yagerageje ibishoboka byose kugira ngo ishake intsinzi mu gace ka gatatu ariko karangira itsinzwe amanota 55-48.
Iminota 10 y’agace ka Kane yari isigaye niyo yagombaga kugena ahazaza ha REG BBC mu irushanwa ry’uyu mwaka, niba isezererwa cyangwa ikomeza. REG BBC yagerageje gushyira imbaraga mu busatirizi bwayo n’ubwugarizi, abakinnyi barimo Shyaka Olivier agerageza kubibafashamo ariko biranga biba ingorabahizi.
Nubwo yagerageje gukora amanota mu masegonda ya nyuuma y’umukino, amahirwe ntiyabasekeye kuko umukino warangiye batsinzwe na FAP amanota 66-63.
Ikinyuranyo cy’amanota 3 cyatumye REG BBC isezererwa mu irushanwa ry’uyu mwaka itageze ku ntego yari yihaye.
About The Author
