Ikipe ya Rayon Sports yakiriye Rutahizamu w’Umunya-Guinée, Alsény Camara Agogo, ushobora guhabwa amasezerano yo kuyikinira mu gihe kiri imbere.
Alsény Camara yageze i Kigali mu ijoro rishyira kuri uyu wa Kane, tariki ya 23 Ugushyingo 2023, yakirwa na Ngabo Roben ushinzwe Itumanaho muri Rayon Sports ndetse na Kana Benie Axella, Umunyamabanga Mukuru wa Rayon Sports y’Abagore.
Uyu rutahizamu w’imyaka 28, ni umwe mu bo Rayon Sports iteganya gushingiraho mu mikino yo kwishyura ya Shampiyona nyuma y’uko bigaragaye ko ubusatirizi bwayo budatanga umusaruro ukwiye.
Umunya-Uganda Musa Esenu umaze gutsinda ibitego bibiri muri Shampiyona y’uyu mwaka, ari ku mpera z’amasezerano muri Rayon Sports ndetse iyi kipe ntiteganya kuyongera muri Mutarama.
Alseny Camara yakiniye Kaloum na Horoya AC iwabo muri Guinée, ASAC Ndiambour, Sacré-Coeur na Guediawaye FC muri Sénégal ndetse na Hassania d’Agadir yo muri Maroc.
Kugeza ubu, Rayon Sports iri ku mwanya wa kane n’amanota 16, irushwa arindwi na Musanze FC ya mbere, izasubira mu kibuga ku wa 25 Ugushyingo 2023, yakirwa na Etincelles FC mu mukino w’Umunsi wa 11 wa Shampiyona uzabera i Rubavu.
About The Author
