Rayon Sports yamenyesheje umutoza Robertinho ko rutahizamu w’Umugande yifuza, Milton Karisa atamubona kuko ahenze.
Tariki ya 25 Nyakanga 2024, ni bwo Robertinho yageze mu Rwanda aho yari agarutse gutoza Rayon Sports yaherukagamo 2019.
Nyuma yo gutoza umukino wa gicuti na Muhazi United ku wa Gatatu w’icyumweru gishize bakayitsinda 1-0, yavuze ko afite ikibazo cya rutahizamu.
Ibi ni byo yasubiyemo ku wa Gatandatu w’icyumweru gishize nyuma yo gutsindwa na Azam FC kuri Rayon Day avuga ko ikipe ye ibura rutahizamu uzamutsindira ibitego byinshi kuko abo afite batari ku rwego yifuza.
Amakuru twamenye ni uko Milton Karisa usatira anyuze ku mpande, Robertinho yabwiye ubuyobozi bwa Rayon Sports ko abona yakemura ikibazo cyo gushaka ibitego muri iyi kipe.
Amakuru avuga ko ubuyobozi bwamubwiye ko ari umukinnyi mwiza ariko bigoye ko bamuzana kuko ahenze batamwigondera.
Amahirwe menshi ni uko agomba gushakira ibisubizo mu bakinnyi afite nka Charles Baale, Umunya-Gabon Nathanael Iga ndetse n’Umunya-Senegal Fall Ngagne.
About The Author
