Mu mukino w’irushanwa rya CAF Confederation Cup ikipe ya Al Hilal Bengazi yo mu gihugu cya Libya warangiye aya makipe yose aguye miswi nyuma yo kunganya igitego 1-1 kuri Kigali Pele Stadium.
Ni umukino wakabaye kuba warabaye ariko kubera ibibazo by’ibiza by’umuyaga byatumye mu gihugu cya Libya haba umwuzure uyu mukino waje gusubikwa maze imikino yose izahuza aya makipe hemezwa ko izabera mu Rwanda.
Kuri iki cyumweru nibwo kuri Kigali Pele Stadium habaye umukino wa mbere uhuza aya makipe yombi, umukino wabaye ukereweho iminota igera kuri 15 kuko ubuyobozi bwa Al Hilal bwasabye ko abantu bari muri sitade ari benshi ugereranije n’umubare impande zombi zemeranyije.
Umukino watangiranye ingufu ku mpande zombi ari nako buri ruhande rugerageza gushaka uburyo bw’igitego ariko igice cya mbere kirangira nta kipe irebye mu izamu ry’iyindi.
Igice cya kabiri cyatangiye nabwo ari uko maze ikipe ya Rayon Sports irijajara ku munota wa 53 ku mupira Moussa Essenu yari agerageje gutera mu izamu, myugariro wa Al Hilal arawukora umusifuzi yemeza ko ari penalite y’ikipe ya Rayon Sports maze ku Luvumbu ayinjizamo neza maze Rayon Sports iyobora umukino ku gitego kimwe ku busa.
Al Hilal yahise ikanguka igerageza uburyo bwinshi bushoboka ari nako Rayon Sports inyuzamo nayo igashaka uburyo ibonamo igitego cy’umutekano cya kabiri nubwo byanze ku munota wa 84 aho Al-Hilal yishyuye igitego yatsinze ku mupira uhinduwe mu rubuga rw’amahina, ushyirwaho umutwe na Ezzeddin Elmarmi amakipe yombi anganya 1-1 ari nako umukino warangiye.
About The Author
