![](https://www.byoseonline.rw/wp-content/uploads/2022/02/rutsro.jpg)
Mu mikino ya shampiyona yakomezaga kuri uyu wa kane tariki ya 17 Gashyantare 2022 akaba ari umunsi wa 17 wa shampiyona y’umupira w’amaguru mu Rwanda aho ikipe ya Police FC yatsindiwe mu karere ka Rusizi n’ikipe ya Espoir FC.
Ku rundi ruhande nanone, kuri sitade ya Kigali i Nyamirambo, ikipe ya Rayon Sports yatsinze ikipe ya Rutsiro FC ku gitego kimwe ku busa(1-0) cyatsinzwe na rutahizamu Mussa Esenu ku munota wa 18 w’umukino.
Ikipe ya Rutsiro isanzwe ihagama Rayon Sports kuko mu mikino itandatu bamaze guhura Rayon Sports yatsinze imikino ibiri, Rutsiro itsinda umukino umwe banganya imikino itatu.
Ikipe ya Police FC yari yakoze urugendo rukomeye na yo yatsinzwe n’ikipe ya Espoir FC yo mu karere ka Rusizi ibitego bibiri ku busa (2-0) ndetse uyu mukino umuzamu w’ikipe ya Police Ndayishimiye Eric Bakame yavunikiye bikomeye muri uyu mukino iyi kipe yatakaje.
Mu karere ka Rubavu kandi ikipe ya Entincelles yari yakiriye Bugesera FC maze uyu mukino birangira zose ziguye miswi ku busa.
Iyi mikino yagize ingaruka ku rutonde rwa shampiyona rukiyobowe n’ikipe ya APR FC ikurikiwe na Kiyovu Sports Mukura Vs ikaba iya gatatu inganya n’ikipe ya Rayon Sports yafashe umwanya wa kane bivuze ko nayo igifite amahirwe menshi yo guhatanira igikombe dore ko izakurikizaho umukino wa Bugesera FC nyuma igahura na mukeba wayo APR FC.