Amakipe abiri yahoze ahangana kuva cyera agiye kuzahurira mu mukino nakita ko ari uwa gicuti mu birori bitegurwa n’ikipe ya Rayon Sport bizwi nka ”Rayon Sports Day”
Uyu munsi wa Rayon Sports Day watangijwe mu mwaka wa 2019 aho iyi kipe yari yatumiye Gasogi United ikaza no kuyitsinda ibitego 3-1. Kuri ubu iyi kipe ya Rayon Sports yatumiye ikipe bahoze bahangana mu kibuga ndetse no hanze yacyo ari yo Kiyovu Sports.
Uyu mukino uzaba ku cyumweru tariki ya 24 Ukwakira ukaba uzabera kuri sitade National Amahoro i Remera saa cyenda ndetse ukazanitabirwa n’abafana bagera ku bihumbi 8 nkuko umuvugizi w’iyi kipe yabitangarije IGIHE.
Yagize ati “Umukino uzitabirwa n’abafana 8000 bikingije COVID-19 kandi bafite ibisubizo bigaragaza ko batarwaye iki cyorezo. Ibijyanye n’ibiciro ntabwo biremezwa.”
Abafana baherukaga kwinjira ku bibuga by’umupira w’amaguru mu Rwanda mbere ya tariki ya 14 Werurwe 2020 ubwo Minisiteri y’Ubuzima yatangazaga ko habonetse umurwayi wa mbere wa COVID-19.
Uyu mukino ubaye uwa mbere kuva corona yatangira wakiriye abafana niwo ugiye kuba igerageza ku nzego z’ubuzima ngo harebwe niba koko imikino y’umupira w’amaguru yajya yakira abafana.
About The Author
