Ikipe ya Real Madrid yakatishije itike ya 1/4 cy’irangiza cya UEFA Champions league, nyuma yo gutsinda PSG ibitego 3-1 ikayisezerera ku giteranyo cy’ibitego 3-2.
PSG yari yaratsinze Real Madrid igitego 1-0 mu mukino ubanza wabereye i Parc des Princes, yari yasuye Real Madrid mu mukino wo kwishyura wabereye i Santiago Bernabeu.
Ni umukino Real Madrid yatangiye yataka cyane, gusa PSG iza kuyibanza igitego cyinjiye ku munota wa 39 w’umukino gitsinzwe na Kylian Mbappé wari wagiye ahusha uburyo bwinshi bw’ibitego.
Byasabye akazi gakomeye abasore b’umutoza Carlo Anchelotti kugira ngo bagombore ibitego bibiri banabone icya gatatu cy’intsinzi.
Ibitego Real Madrid yatsinze muri uyu mukino byose byinjiye mu gice cya kabiri cy’umukino bitsinzwe na Karim Benzema.
Ku myaka 34 n’iminsi 80, uyu rutahizamu w’Umufaransa yahise aca agahigo ko kuba umukinnyi ukuze kurusha abandi utsinze ibitego bitatu mu mukino umwe wa UEFA Champions league.
Indi kipe yageze muri 1/4 cy’irangiza ni Manchester City yaguye miswi na Sporting Lisbon yo muri Portugal 0-0, iyisezerera ku giteranyo cy’ibitego 5-0 yayitsindiye mu mukino ubanza
About The Author
