Polisi y’u Bwongereza yataye muri yombi batandatu babaye abapolisi nyuma y’aho iperereza rigaragaje ko bakwirakwije mu itsinda rya WhatsApp ubutumwa bw’ivangura buvuga ku Rwanda na Pakistan.
Aba ni Peter Booth w’imyaka 66 y’amavuko, akaba yaravuye muri Polisi muri Mata 2001, Robert Lewis w’imyaka 62, wasezerewe mu 2015, Anthony Elsom w’imyaka 67, wasezerewe mu 2012, Alan Hall w’imyaka 65, wasezerewe mu 2015, Michael Chadwell w’imyaka 62, wasezerewe mu 2015 na Trevor Lewton w’imyaka 65, wasezerewe mu 2009.
Nk’uko ibinyamakuru bitandukanye byo mu Bwongereza bimaze kubitangaza, aba Bongereza bari basanzwe bakorera urwego rwigenga rurinda umutekano w’abashingamategeko n’abadipolomate, bikaba byaragaragaye ko bakwirakwije ubu butumwa hagati ya Kanama 2018 na Nzeri 2022.
Ikinyamakuru The Sun cyatangaje ko ubutumwa bwakoze kuri aba Bongereza burimo ubuvuga kuri gahunda y’u Rwanda n’u Bwongereza yo kuzana abimukira i Kigali, umwuzure uherutse kwica abantu 1700 muri Pakistan ndetse n’igikomangoma Harry n’umugore we Meghan Markel.
Iperereza kuri aba bagabo ryatangiye nyuma y’inkuru y’ubucukumbuzi BBC yabatangajeho mu Kwakira k’umwaka ushize. Umwe mu bakomanda bariyoboye, James Harman yagize ati: “Ubwo twamenyeshwaga ibi birego, twatangiye iperereza. Nshimishijwe n’uko nyuma y’akazi gakomeye, twabashije kubitahura.”
Gusa kubera impamvu yo gusigasira ihame ry’ubunyamwuga, nta ruhande, rwaba Polisi ndetse n’ibinyamakuru byo mu Bwongereza, rwigeze rusubiramo amagambo aba bagabo bakoresheje muri iri tsinda rya WhatsApp.
Biteganyijwe ko bazatangira kuburanishirizwa mu rukiko rwa Westiminster tariki ya 7 Nzeri 2023.
About The Author
