Mu gihe inkuru z’itandukana rya Harmonize n’uwahoze ari umukunzi we Kajala Farida zigishyushye mu itangazamakuru ryo muri Tanzania, amakuru mashya ahari ahamya ko uyu muhanzi ubu ari mu munyenga w’urukundo n’Umunyarwandakazi Munezero Rosine benshi bazi nka Dabijou.
Mu ntangiriro z’Ukuboza 2022 nibwo Kajala yatandukanye na Harmonise. Ku wa 16 Ukuboza 2022 Dabijou yasangije abamukurikira kuri Instagram amafoto ari kurya ubuzima ku mucanga wo muri Tanzania, aho byaje kumenyekana ko yari kumwe na Harmonize.
Nyuma yo kubona aya mafoto Igihe dukesha iyi nkuru yaje kubona amashusho agaragaza ko uyu mukobwa yari ari gusangira ubuzima n’uyu muhanzi bamaze iminsi bacuditse. Amakuru yizewe ahamya ko kuva mu ntangiriro z’Ukuboza 2022, Harmonize amaze gutandukana na Kajala yahise yifatira uyu mukobwa w’Umunyarwandakazi bari bamaze igihe babanye neza.
Aya makuru kandi ahuriranye n’uko Harmonize ubwe bwite, abinyujije ku mbuga nkoranyambaga yatangaje ko hari umukobwa uri kumukurura ku buryo mu minsi mike ashobora kwisanga mu rukundo.
Ubu butumwa yabukurikije amafoto y’imodoka eshatu, agaragaza ko yiteguye guha uyu mukobwa mushya yihebeye.
Dabijou uri kuvugwa mu rukundo na Harmonize mu 2017 yigeze kumvikana mu nkuru z’urukundo rwe na Nizzo Kaboss ndetse hashyirwa hanze amashusho bari gusomana.
Uyu mukobwa ukurikirwa n’abatari bake ku mbuga nkoranyambaga bakururwa cyane n’uko ateye, aherutse kuvugisha ukuri ahamya ko atari ko yavutse ahubwo yaje kwibagisha ngo abe ateye neza.
About The Author
