Umunyamakuru akaba n’umunyarwenya mu Rwanda Nkusi Arthur yamaze gutangariza abakunzi be ko yasezeye itangazamakuru guhera kuri uyu munsi tariki ya 24 Ukuboza 2021.
Ibi uyu munyarwenya akaba n’umunyamakuru yabitangaje ubwo yari amaze imyaka igera mu icumi akorera igitangazamakuru cya Kiss fm aho yakoranaga na Sandrine Ishenja.
Uyu mugabo uherutse gukora ubukwe n’umwe mu bahataniye ikamba rya Nyampinga yatangaje ko atazongera kumvikana kuri Kiss fm benshi bari bamumenyereyeho mu kiganiro cya mu gitondo avuga ko yihaye akaruhuko ko gukora itangazamakuru.
Abinyujije ku rukuta rwe rwa Twitter Yagize ati: “Muraho basore! Sinari narigeze ntekereza ko none waba umunsi nsangiza aya makuru. Ejo ku wa 24 Ukuboza uzaba umunsi wanjye wa nyuma numvikanye kuri Kiss FM.”
Nkusi Arthur w’imyaka hafi 32 y’amavuko, ni mwene Mazimpaka Jones Kennedy na Kibuuka Harriet akaba avuka mu muryango w’abana batandatu.
Uyu mugabo uri mu bafite izina riremereye mu myidagaduro nyarwanda, akomoka mu muryango w’ibyamamare uhereye kuri Se umubyara Mazimpaka Kennedy wamenyekanye mu ikinamico na sinema ndetse no gusobanura filimi mu Kinyarwanda. Avukana kandi n’umuhanzi Sintex umaze kwigarurira imitima ya benshi mu muziki.
About The Author
