Urukiko Rukuru rwasubitse kuburanisha urubanza Ubushinjacyaha buregamo Prince Kid wahoze ategura irushanwa rya Miss Rwanda, uregwa ibyaha birimo guhoza ku nkeke bifitanye isano n’imibonano mpuzabitsina.
Ni urubanza rwagombaga gusomwa ku wa 30 Kamena, ariko hanzurwa ko iburanisha ryongera gutangira kubera amajwi mashya Ubushinjacyaha bwatanze, atarigeze aburanwaho mbere.
Ubwo iburanisha ryasubukurwaga kuri uyu wa Gatanu, Price Kid yari yitabiriye urubanza hamwe n’umugore we Iradukunda Elsa.
We n’abamwunganira mu mategeko bagaragaje ko hari inyandiko isobanura amajwi yatanzwe n’Ubushinjacyaha nk’ikimenyetso gishya banagombaga kuburana, kimwe na raporo yabahanga igaragaza ko ari amajwi y’umwimerere, yashyizwe mu ikoranabuhanga bitinze.
Ibyo bikaba byari bigize inzitizi, kuko uregwa atari yiteguye kubyireguraho. Ni ingingo urukiko rwahaye agaciro, rwemeza ko urubanza rusubikwa, rukazaburanwa ku wa 15 Nzeri 2023.
Ku wa 29 Mata 2023 Urukiko Rukuru rwari rwasoje kumva impande zombi mu bujurire bw’Ubushinjacyaha mu rubanza ruregwamo Ishimwe Dieudonné. Akurikiranyweho ibyaha byo gukoresha imibonano mpuzabitsina ku gahato no guhoza undi ku nkeke bifitanye isano n’imibonano mpuzabitsina.
Ubushinjacyaha bwajuririye icyemezo cy’Urukiko Rwisumbuye cyagize umwere Prince Kid, bugaragaraza ko umucamanza atitaye ku bimenyetso byatanzwe na zimwe mu mvugo z’abatangabuhamya.
Me Nyembo Emeline wunganira Prince Kid, yavuze ko ubusanzwe iyo ubushinjacyaha bujurira bukwiye kuba bunenga ingingo zaburanywe mu rubanza rwa mbere ariko ko ubu atari ko bimeze.
Yagaragarije urukiko ko Ubushinjacyaha bushaka kuzana ingingo zitaganiriweho mu Rukiko Rwisumbuye nk’ibimenyetso kandi atari ko byagakwiye kugenda.
About The Author
