Nyanza: Urujijo ku munyeshuri wapfiriye ku ishuri

Umunyeshuri wigaga mu ishuri rya Nyanza TVET School (ETO Gitarama) riherereye mu kagari ka Butansinda, mu Murenge wa Kigoma mu Karere ka Nyanza yariho akora siporo mu kibuga ahita yitaba Imana.

Mu masaha ya ni mugoroba saa kumi n’imwe kuri uyu wa 23 Gicurasi 2022 umunyeshuri witwa Manishimwe Jean Pierre w’imyaka 22 y’amavuko wigaga mu ishuri rya Nyanza TVET mu mwaka wa kane w’amashuri yisumbuye, ishami ry’ubwubatsi yarimo akora siporo ahita apfa.

Harerimana Jean Damascene umuyobozi w’ishuri wungirije ushinzwe imyitwarire yabwiye Umuseke dukesha iyi nkuru ko nyakwigendera yarimo akora imyitozo njyarugamba.

Ati “Yitabye Imana ari mu kibuga cy’umupira w’amaguru, mu gihe yarimo akora siporo aho yagendaga agakora ku izamu (ipoto) maze akinaga, akubita umutwe w’imbere hasi anakuba ijosi cyane ko yari asanzwe atoza abandi banyeshuri imikino njyarugamba (acrobat).”

Harerimana yakomeje avuga ko ibyo byabaye mu gihe umupira w’amaguru bariho bakina wari ugize ikibazo basa nk’abafashe akaruhuko na we aba akora siporo njyarugamba asanzwe akora.

Umuyobozi w’akarere ka Nyanza wungirije ushinzwe imibereho myiza y’abaturage Kayitesi Nadine mu gitondo cyo kuri uyu wa 24 Gicurasi 2022 yagiye kuganiriza abanyeshuri, abasaba kwihangana anabibutsa kwirinda ibintu byose bakora bigashyira ubuzima bwabo mu kaga.

Amakuru yamenyekanye ngo ni ko nyakwigendera yavukaga mu Murenge wa Busoro, mu Karere ka Nyanza akaba yari Umuyobozi w’abanyeshuri mu ishuri (Chef de Classe), akimara kwikubita hasi bamujyanye kwa Muganga wo mu kigo abona akwiye kujya ku Bitaro bya Nyanza mu gihe bategereje imbangukiragutabara (ambulance) nibwo yitabye Imana.

Umurambo wahise ujyanwa ku Bitaro bya Nyanza kugira ngo ukorerwe isuzuma.