Abantu babiri batawe muri yombi nyuma yo gusanga berekanye ubutumwa bugaragaza ko bipimishije corona bw’ubuhimbano bahita batabwa muri yombi na Polisi ikorera mu karere ka Nyanza.
Aba bantu ni Umusore wari wagiye mu muhango wo gusaba no gukwa Umukobwa ndetse n’umusangiza w’amagambo wari uri muri ubu bukwe mu gihe abandi bantu bari bitabiriye ubukwe bahise biruka amaguru bayabangira ingata Polisi ifata uyu musore wari waje gusaba.
Bafashwe ku Cyumweru taliki ya 19 Ukuboza 2021 mu mihango yo gusaba no gukwa yabereye mu Mudugudu wa Gasharu mu Kagari ka Katarara Murenge wa Ntyazo.
Umuvugizi wa Polisi mu Ntara y’Amajyepfo, SP Theobald Kanamugire, yavuze ko abo bantu bafashwe mu bikorwa bisanzwe bya Polisi byo kugenzura iyubahirizwa ry’amabwiriza yo kurwanya Covid-19.
Ati “Abapolisi bari mu kazi bisanzwe bagenzura iyubahirizwa ry’amabwiriza yo kurwanya Covid-19 baza kugera mu Kagari ka Katarara bahasanga abantu benshi bari mu bukwe bwo gusaba no gukwa. Bagenzuye ibyangombwa by’abo bantu bari batashye ubukwe, baje gusanga ibyangombwa by’umusangiza w’amagambo afite ubutumwa buhimbano bugaragaza ko nta bwandu bwa Covid-19 yanduye. Byaje kugaragara ko ubwo butumwa atari umwimerere w’Ikigo cy’Igihugu cy’ubuzima (RBC), ako kanya yahise afatwa.”
Yakomeje avuga ko akimara gufatwa yavuze ko ubwo butumwa yabwohererejwe n’umusore wari ugiye kurongora, na we ahita atabwa muri yombi.
SP Kanamugire yibukije abantu ko Covid-19 itarangiye bityo bagomba kubahiriza amabwiriza yose uko yakabaye.
Yabasabye kwirinda kunyura mu nzira zose zibaganisha mu byaha harimo kuriya guhimba ubutumwa bugaragaza ko bipimishije Covid-19 kandi atari byo.
Abafashwe bahise bashyikirizwa Urwego rw’Igihugu rw’Ubugenzacyaha (RIB) rukorera muri Sitasiyo ya Polisi ya Ntyazo kugira ngo bakurikiranwe mu mategeko.
About The Author
