Umunyeshuri wo mu Ishuri ry’indimi rya Gatovu (EL GATOVU) riherereye mu karere ka Nyabihu, umurenge wa Kintobo birakekwa ko yanyweye imiti yica imbeba agapfa, amakuru y’ibanze avuga ko intandaro y’uru rupfu ari amakimbirane yo mu miryango.
Ishuri ry’indimi rya Gatovu riherereye mu murenge wa Kintobo, akagari ka Gatovu ho mu mudugudu wa Gatovu, amakuru y’urupfu rwa Ineza Muhumuza Happy wavutse mu mwaka wa 2008, wigaga mu mwaka wa Gatatu w’amashuri y’isumbuye yamenyekanye mu ijoro ryo ku wa Gatanu rishyira ku wa Gatandatu.
Ineza, ababyeyi be basanzwe batuye mu karere ka Musanze, umurenge wa Muhoza.
Niyibizi Louis, Umunyamabanga Nshingwabikorwa w’murenge wa Kintobo yahamirije BWIZA amakuru y’urupfu rwa Ineza.
Ati: “Amakimbirane yo mu muryango niyo akekwaho kuba yaratumye Ineza afata icyemezo kigayitse anywa imiti yica imbeba, aho amakuru twayamenye agipfa ku wa Gatanu saa tanu z’ijoro, aho yagejejwe ku kigo nderabuziman cya Kintobo bahita bamwohereza ku bitaro bikuru bya Musanze agapfa akihagera.”
Akomeza avuga ko nyuma y’uru rupfu baganirije abanyeshuri babasaba ko nubwo haba hari amakimbirane ari mu miryango batagakwiriye gufata icyemezo kigayitse cyo kwiyambura ubuzima, ahubwo bajya babiganirizaho abayobozi bakabagira inama.
Aba banyeshuri ba EL GATOVU babasabwe kugira umuco wo gutangira amakuru ku gihe, ku buryo habaho gukumira.
About The Author
