Itsinda riturutse mu kigo cy’Igihugu gishinzwe Iterambere ry’ubwikorezi RTDA, basuye umuhanda Nyakinama-Vunga ho mu karere ka Nyabihu harebwa uko uyu muhanda ukomeje kwangirika ndetse hanashakishwa umuti urambye kuri uyu muhanda.
Mu ruzinduko bagiriye muri uyu muhanda baherekejwe na Mayor w’Akarere ka Nyabihu Mukandayisenga Antoinette, basanze uyu muhanda warangiritse cyane ku buryo bidindiza iterambere ry’abaturage batuye mu mirenge ya Rugera na Shyira uyu muhanda unyuramo dore ko haba umusaruro ukomoka ku buhinzi bw’ibitoki ushimishije.
Uyu muhanda uhuza akarere ka Musanze, Nyabihu, Ngororero ndetse na Muhanga ukunze gukoreshwa cyane cyane mu bushabitsi bw’ibikomoka ku buhinzi bw’urutoki bukunze gukorerwa mu masoko abiri akomeye ari yo Kinkware na Vunga.
Uyu muhanda utangirira i Nyakinama mu karere ka Musanze kuko ari ho kaburimbo irangiriye ubundi ukamanuka mu sentere ya Vunga mu murenge wa Shyira ahari n’ibitaro by’akarere ka Nyabihu Umukuru w’igihugu yatashye ku mugaragaro tariki 04 Nyakanga 2017 ari nabwo uyu muhanda wari uherutse gusanwa.
About The Author
