Myugariro mpuzamahanga w’umunyarwanda wakiniraga ikipe ya Urartu FC muri Armenia, Nirisarike Salomon yatandukanye n’iyi kipe.
Uyu mukinnyi ukina mu mutima w’ubwugarizi yari ageze ku mpera z’amasezerano ye muri iyi kipe, impande zombi zikaba zahisemo kutongera amasezerano. Iyi kipe yatangaje ko Nirisarike Salomon ari mu bakinnyi 3 batazakomezanya na Urartu FC.
Ati “Annan Mensah, Armen Manucharyan na Salomon Nirisarike bazatandukana na Urartu FC. Ikipe irashaka gushimira aba bakinnyi uburyo bitanze mu mikino bakinnye, tubifurije amahirwe mu rugendo rwabo rw’ahazaza.”
Nirisarike Salomon atandukanye n’iyi kipe nyuma y’umwaka n’igice ayikinira, yayinjiyemo muri Gashyantare 2021 hari nyuma yo gutandukana na FC Pyunik yo muri iki gihugu.
Mu mwaka n’igice yamaze muri iyi kipe, umwaka ushize yayifashije gusoza ku mwanya wa 4 ndetse babona itike yo gukina irushanwa rya UEFA Europa Conference League.