Umuhanzi Bruce Melodie yavuze ko adashobora kumenyekanisha indirimbo ya The Ben kubera ko atari ko kazi ke kandi na The Ben ngo akaba atajya amenyekanisha ize.
Bruce Melodie yabitangaje kuri iki Cyumweru nyuma y’umunsi umwe The Ben ashyize hanze indirimbo ‘Ni Forever’ yatuye umugore we Uwicyeza Pamela.
Indirimbo ikimara kujya hanze yasamiwe hejuru n’abakunzi b’umuziki nyarwanda ndetse bagenzi ba The Ben barimo Ngabo Medard uzwi nka Meddy agaragaza ko ari indirimbo nziza, ayisangiza abamukurikira ku mbuga nkoranyambaga.
Semitego Muzafaru uzwi nka ddumba.a yakoze ikiganiro kigufi kuri Instagram, atumiramo Bruce Melodie.
Mu bibazo yamubajije, harimo n’impamvu atashyize indirimbo ya The Ben ku mbuga nkoranyambaga ze kandi abandi bahanzi babikoze.
Mu gusubiza, Bruce Melodie yavuze ko atari akazi ke kwamamaza indirimbo z’abahanzi bagenzi be.
Ati “Ni nde wababwiye ko namamaza indirimbo? None se we ajya anshyira ku mbuga ze (posting)? Iyi ndirimbo ni nziza ariko ntabwo ndi buyisangize abankurikira.”
Bruce Melodie yakomeje avuga ko nta mwanya afite wo kumenyekanisha indirimbo ya The Ben.
Ati “Uwo muco ntawo dufitanye twembi. The Ben yasohoye indirimbo nziza cyane ariko muri gahunda yo kwamamaza mfite ibintu byinshi, ku buryo iyo nta yirimo. Na we ayiyamamarize nkuko nanjye ndwana n’izanjye. Na we ntajya yamamaza izanjye.”
Bruce Melodie ari muri Leta zunze ubumwe z’Amerika mu bitaramo no kwamamaza ‘When She’s Around’, yakoranye na Shaggy. Ku itariki 30 Ukuboza 2023 azataramira abakunda umuziki we batuye i Portland.
Avuze ibi mu gihe hashize iminsi havugwa umwuka mubi hagati y’aba bahanzi bombi, The Ben na Bruce Melodie nubwo bakunze kuvuga ko bahanganishwa n’abafana.
Indirimbo Ni Forever ya The Ben yakozwe na Producer Kozze, naho amashusho yakozwe na John Elarts wo mu Burundi.
Ni indirimbo yafatiwe amashusho mu Burengerazuba bw’u Rwanda, mu muhanda wo mu ishyamba rya Nyungwe, andi afatirwa mu nyubako za Sadate Munyakazi wahoze ari Perezida wa Rayon Sports i Rusororo.
About The Author
