Igisasu cyo mu bwoko bwa Grenade cyishe umwana w’imyaka 10 y’amavuko, gikomeretsa bikomeye undi mwana mugenzi we bari kumwe ubwo bari bari kugikinisha bakitiranije n’ikindi gikoresho gisanzwe.
Umunyamabanga Nshingwabikorwa w’Umurenge wa Ngororero mu Karere ka Ngororero, Mugisha Daniel yatangarije Umuseke dukesha iyi nkuru ko Grenade yishe umwana witwa Mugisha Tito, ikomeretsa mugenzi we witwa Niyonkuru Thomas wahise ajyanwa mu bitaro.
Ni igisasu cyarutitse ku wa Kane taliki ya 15/12/2022 aho gitifu Mugisha Daniel avuga ko byabereye mu Mudugudu wa Kabeza, mu Kagari ka Gaseke, mu Murenge wa Ngororero ariko kugeza ubu ngo ntibaramenya aho iyo grenade abana bayikuye, gusa Gitifu avuga ko amakuru bahawe ari uko ikimara guturika yishe umwana witwa Mugisha Tito.
Yagize ati: “Niyonkuru Thomas wakomeretse yabanje kujyanwa mu Bitaro bya Muhororo, abaganga baza kumuha transfert n’imbangukiragutabara ajyanwa i Kabgayi.”
Mugisha Daniel uyobora Umurenge wa Ngororero, avuga ko uyu munsi aribwo uriya mwana yashyinguwe.
Mugisha Tito yigaga mu mwaka wa 5 w’amashuri abanza, naho Niyonkuru Thomas yiga mu mwaka wa 4 w’amashuri abanza.
About The Author
