Umukinnyi usanzwe akinira ikipe y’Igihugu ya Volleyball Mutabazi Yves yaburiwe irengero aho yari atuye muri Leta z’unze ubumwe z’Abarabu aho yakiniraga ikipe ya Al Jazira SC.
Amakuru y’uko uyu musore yaburiwe irengero yatangiye gucicikana kuri iki Cyumweru tariki 23 Mutarama, gusa umuryango we wo uvuga ko amaze icyumweru kirenga yaraburiwe Irengero.
Amakuru yizewe byoseonline ni uko Ambasade y’u Rwanda muri Leta Zunze Ubumwe z’Abarabu, yatangaje ko yamenye amakuru ko Umunyarwanda, Mutabazi Yves ukina Volleyball wabigize umwuga, yaba yaburiwe irengero muri iki gihugu, hakaba yashyizwe imbaraga mu kumushakisha.
Mutabazi Yves aburiwe irengero mu gihe yari amaze iminsi yandika ku mbuga nkoranyambaga ubutumwa bwerekana ko ashobora kuba atamerewe neza.
Urugero ni nk’ubwo yanditse ku rukuta rwe rwa ‘Instagram’ mu cyumweru gishize agaragaza ko akeneye umuntu wamufasha gutaha. Ubu butumwa bwaje bukurikira ubundi yari yanditse asaba Perezida wa Repubulika kumufasha gutaha.
Mutabazi ufatwa nk’umwe mu bakinnyi bafite impano idasanzwe muri Volleyball, yatangiye gukinira Ikipe y’Igihugu Nkuru afite imyaka 19. Yatwaye Shampiyona y’imbere mu gihugu ari muri APR mu 2014 mu gihe kandi yakiniye Ikipe y’Igihugu y’Abatarengeje imyaka 21. Uyu musore w’imyaka 27 yanyuze mu makipe atandukanye arimo REG na Gisagara VC.
Mu Ugushyingo umwaka ushize yari yahawe igihembo na Madamu Jeannette Kagame nk’umwe mu rubyiruko rw’indashyikirwa mu muhango wo kwizihiza Isabukuru y’Imyaka 20 Umuryango Imbuto Foundation umaze ushinzwe.
About The Author
