Polisi ikorera mu Karere ka Musanze ku bufatanye n’abashinzwe umutekano mu bamotari, bafashe uwitwa Habimana Céléstin w’imyaka 25 y’amavuko ukekwaho kwiba moto yiyita umusirikare wa RDF.
Habimana yafatiwe mu Murenge wa Muhoza, mu Kagari ka Mpenge, Umudugudu wa Rukoro ku wa Gatatu tariki ya 16 Gashyantare. Moto akekwaho kwiba ni iyo mu bwoko bwa TVS Victor ifite ibirango RD 371J.
Ushinzwe guhuza ibikorwa bya Polisi n’abaturage mu Ntara y’Amajyaruguru, Superintendent of Police (SP) Alex Ndayisenga, yabwiye urubuga rwa Polisi y’Igihugu ko Habimana yahagaritswe n’abashinzwe umutekano mu bamotari bo mu Karere ka Musanze, bamubajije ibyangombwa bya moto n’uruhushya rumwemerera kuyitwara arabibura.
Yavuze ko bamubajije ibyangombwa bye avuga ko ari umusirikare avuye mu Karere ka Rubavu.
Ati: “Bamaze kumuhagarika bamushyikirije Polisi abazwa ibyangombwa bya moto arabibura, bamubaza uruhushya rumwemerera kuyitwara ararubura. Yabajijwe ibyangombwa bye nabyo arabibura avuga ko ari umusirikare avuye mu Karere ka Rubavu mu Murenge wa Nyakiriba, nta karita ya gisirikare afite ntanashobora gusobanura aho akorera cyangwa aho avuka.“
SP Ndayisenga yavuze ko bicyekwa ko iyo moto yari yayibye, bityo Habimana akaba yahise ashyikirizwa Urwego rushinzwe Ubugenzacyaha (RIB) kugira ngo hakorwe iperereza hamenyekane nyiri moto.
About The Author
