Mu gihe mu Rwanda hakomeje igikorwa cyo gukingira icyorezo cya covid, hirya no hino mu gihugu hagiye hashirwaho abakozi bashinzwe gukurikirana ndetse no kwinjiza amakuru muri sisitemu ya RBC ahamya ko umuntu yahawe urukingo.
Umuforomo ukorera ku Kigo Nderabuzima cya Karwasa, giherereye mu Karere ka Musanze, yatawe muri yombi nyuma y’uko byari bimaze kugaragara ko yakoresheje ikoranabuhanga mu kwinjiza muri sisitemu imyirondoro y’abantu babiri bo mu Karere ka Karongi, agaragaza ko bakingiwe tariki 14 Ukuboza 2021, ndetse abaha na Code zibishimangira nkuko Kigalitoday yabitangaje.
Ayo makuru yamenyekanye mu buyobozi bw’Ikigo nderabuzima cya Karwasa, nyuma y’uko bubibwiwe n’Umurenge abo bantu binjijwe muri sisitemu uko ari babiri bakomokamo, nk’uko byemejwe n’Umuyobozi w’Ikigo Nderabuzima cya Karwasa, Byukusenge Salvator.
Yagize ati “Amakuru y’uko uwo muforomo yaba yarinjije abantu muri sisitemu igaragaza abakingiwe kandi atari byo, twayahawe n’ubuyobozi bw’Umurenge wa Mubuga mu Karere ka Karongi, bwari buzi neza ko abo baturage banze kwikingiza kuva na mbere. Byaje kugaragara ko muri telefoni zabo bafite ubutumwa bwemeza ko bikingirije ku Kigo Nderabuzima cya Karwasa mu Karere ka Musanze”.
Yakomeje agira ati “Byabaye ngombwa ko natwe dukurikirana niba koko baba barahikingirije, tubonye bidasobanutse tubikorera raporo, tugaragaza ko aya makosa yaba yarabayeho, tuyishyikiriza ubuyobozi budukuriye. Uwo muforomokazi, yashyikirijwe inzego zibishinzwe, ubwo ni zo zizagaragaza ukuri”.
Umuhoza Valentine, yari umwe mu bakozi bashya, baheruka guhabwa akazi mu buryo bw’ibiraka by’amezi atandatu muri gahunda yihariye y’ikingira, akaba yari ahamaze amezi abiri akora muri iyo serivisi. Yahise atabwa muri yombi, akaba ari mu maboko y’Urwego rw’igihugu rw’Ubugenzacyaha (RIB).
Byukusenge akangurira abatanga bene izi serivisi kurangwa n’ubunyangamugayo, bakaba maso mu gihe buzuza amakuru y’abakingiwe kandi bakagira uruhare mu gukangurira abantu kumva ko kwikingiza biri mu nyungu zirengera ubuzima bwabo.
About The Author
