Ikipe y’Ingabo z’Igihugu, APR FC, yakoze akarasisi k’Igikombe cya Shampiyona yegukanye ku Cyumweru itsinze Gorilla FC ibitego 2-1, izenguruka mu Mujyi wa Kigali isoreza i Shyorongi.
APR FC yakoze ibyo yasabwaga, itsindira Gorilla FC i Nyamirambo, mu gihe i Muhanga na Kiyovu Sports yatsinze Rutsiro FC ibitego 3-1, ariko ntacyo byayifashije kuko yarushwaga ibitego n’Ikipe y’Ingabo zanganyije amanota 63.
Ibyishimo by’Igikombe cya 21 cya Shampiyona kuri iyi kipe yambara umukara n’umweru byatangiriye muri Kigali Pelé Stadium nyuma y’umukino, ubwo abakinnyi bashimiraga Imana yabafashije kwegukana intsinzi yabahesheje igikombe bari bamaze iminsi 282 bahatanira.
Abakinnyi bishimye bidasanzwe barimo Kwitonda Alain Bacca waryamye mu kibuga agasakuza cyane kubera ibyishimo, na myugariro Ndayishimiye Dieudonné na Ishimwe Fiston bapfukamye bashimira Imana ibahaye igikombe cya shampiyona babonye ku kinyuranyo cy’ibitego.
Nyuma y’aba abakinnyi, abatoza n’abandi bakozi ba APR FC bagiye kwishimana n’abafana babo mu bice bitandukanye bya Kigali Pelé Stadium.
Nyuma y’ibi birori, abakinnyi ndetse n’abafana ba APR FC bazengurutse Umujyi wa Kigali mu modoka ndende ya Tembera u Rwanda bafite Igikombe cya Shampiyona, kugera i Shyorongi aho ikipe isanzwe icumbika.
Uru rugendo rwatangiriye kuri Kigali Pelé Stadium rukomereza i Nyamirambo kuri 40, baca mu Biryogo bakomereza ku Gitega, bazamukira kuri ‘Feux Rouge’ baca ahazwi nko ku Itorero Inkuru Nziza aba ariho bakatira bagana ku Isoko rya Nyarugenge, bakomereza mu mujyi rwagati bakatira kuri Kigali City Tower, bakata rimwe bagaruka kuri City Plaza, ari naho bakatiye basubira kuri City Tower.
Bamanutse bagana kuri CHIC, bakomereza kuri Yamaha, i Nyabugogo, Giticyinyoni, bakomereza i Shyorongi ku icumbi ry’ikipe aho baruhukiye.
Abafana baherekeje iyi kipe baba abateze moto ndetse n’imodoka, ndetse hari n’abakurikiye imodoka yari itwaye ikipe bagenda n’amaguru, gusa bageze hagati barananirwa, basubira inyuma.
Abafana bageze kuri hoteli y’ikipe barataha, bizezwa n’abakinnyi ko ubusabane nyirizina buzaba tariki 3 Kamena nyuma yo kwegukana Igikombe cy’Amahoro, ku mukino bazacakiranamo na mukeba w’ibihe byose, Rayon Sports FC.
About The Author
