Abapolisi bo mu Bufaransa batangiye imyigaragambyo bamagana ko bagenzi babo bane batangiye gukurikiranwa n’amategeko, ndetse umwe yafunzwe azira umuntu warasiwe mu mujyi wa Marseille.
Amahuriro y’Abapolisi mu Bufaransa yahamagariye abapolisi bose mu gihugu kujya mu myigaragambyo, bamagana ibivugwa ko bakoresha ingufu z’umurengera mu gukurikirana ibibazo, nyuma y’uko abapolisi bane bo muri Burigade ya ishinzwe Kurwanya Ibyaha (Brigade anti-criminalité), yo muri Marseille, bajyanywe guhatwa ibibazo ndetse umwe muri bo agafungwa mu ijoro ryo kuwa Kane rishyira kuwa Gatanu.
Itangazo ryashyizwe ahagaragara na Unité – SGP Police Force rihamagarira “Abapolisi bose bakorera mu gihugu guhagarika akazi kuhera ubu.”
Icyemezo cyafashwe kivuga ko abapolisi baza ku biro bakoreraho ariko batajya mu bice bitandukanye bajyaga boherezwamo umunsi ku wundi mu gucunga umutekano, haba ku mihanda n’ahandi.
Iki cyemezo gikurikiye ifungwa ry’agateganyo rya mugenzi wabo ushinjwa “guhohotera umuntu by’indengakamere abigambiriye” mu mujyi wa Marseille.
Aba bapolisi bane ba BAC bakurikiranyweho kurasa umuntu w’imyaka 21 mu ijoro rya tariki ya 1 rishyira iya 2 Nyakanga 2023, i Marseille, byatumye uwarashwe amara amasaha menshi muri koma ndetse byemezwa ko azamara amezi abiri atabasha gukora.
Ibi kandi bikurikiye ubwicanyi bwakorewe umusore w’imyaka 17 witwa Nahel, warashwe n’umupolisi tariki 27 Nyakanga 2023, nyuma y’uko bahagaritse imodoka yagendagamo akanga guhagarara.
Ihuriro ry’Abapolisi ryatangaje ko iki cyemezo cyo gufunga umupolisi kidakurikije ubutabera ndetse gitesha agaciro umwuga wabo, kikanawushyira mu kaga gakomeye.
Andi mahuriro y’Abapolisi abiri arimo Alliance Police Nationale na Unsa Police na yo yanditse amatangazo ashyigikira iyi myigaragambyo yo kutajya mu bice abapolisi basanzwe boherezwamo gucunga umutekano.
Loni kimwe n’indi miryango mpuzamahanga itari iya Leta yasabye u Bufaransa guhagurikira ikibazo cy’ivangura rishingiye ku ruhu no gusubiramo amabwiriza y’ikoreshwa ry’intwaro ku bapolisi bari mu kazi.
Mu 2022 gusa, abantu 13 bishwe barashwe n’abapolisi bashinzwe umutekano wo mu muhanda bazira gusa ko babahagaritse abakanga guhagarara.
About The Author
