Nyampinga w’u Rwanda 2022, Miss Muheto Nshuti Divine, kuri uyu wa 4 Mata 2022 yagiranye ibiganiro na Guverineri w’Intara y’Iburengerazuba ari na ho yiyamamarije mu gihe yahataniraga ikamba.
Mu biganiro yagiranye na Guverineri w’Intara y’Iburengerazuba Habitegeko François, harimo umushinga wo kurwanya imirire mibi n’igwingira ry’abana azafatanya na Africa Improved Food mu rwego rwo gutanga umusanzu mu kurwanya iki kibazo. Iyi ntara y’Iburengerazuba iri mu zugarijwe n’iki kibazo ku rwego rwo hejuru.
Guverineri w’Intara y’Iburengerazuba yashimiye uyu mukobwa wihutiye kubasura ndetse akaba yiyemeje kubafasha muri gahunda yo kurwanya imirire mibi.
Ati:“Njya mbona ibikorwa byawe none n’aha utugezeho nta minsi ishize, wakabaye uruhuka kuko uba warakoze akazi gakomeye. Ariko wowe kuruhuka ntubirimo mu bigaragara, ibi bigaragaza ko witabiriye uzi icyo ushaka.”
Guverineri Habitegeko yijeje Miss Muheto kumuba hafi nkubuyobozi bw’Intara.
Ati:“Ikaze mu bafatanyabikorwa b’Intara yacu, twiteguye kugendana na we muri uru rugendo urimo kandi twishimiye intsinzi yawe, tugomba no kukuba hafi mu kwesa imihigo wahize cyane cyane nk’iyi gahunda yo kurwanya igwingira ndetse n’imirire mibi mu ntara yacu kuko natwe biri mu bibazo tugomba gukemura.”
Miss Nshuti Muheto Divine yatowe ku wa 19 Werurwe 2022 mu birori byabereye mu Intare Arena, yari afite umushinga wo gukangurira urubyiruko kuzigama mu mushinga we yise ’Igiceri Youth Program’.
About The Author
