Miss Elsa Iradukunda ukurikiranyweho n’ubushinjacyaha ku cyaha kirimo impapuro mpimbano azitaba urukiko rw’ibanze rwa Kicukiro kuri uyu wa Kabiri taliki 24, Gicurasi, 2022 akazaba ari kumwe n’uwo bareganwa noteri Nasra.
Mu rukiko bazasubirirwamo ibyo baregwa, bavuge niba babyemera cyangwa babihakana. Uyu Nasra ni Noteri bivugwa ko yagize uruhare mu guhimba inyandiko ubushinjacyaha bukurikiranyeho Miss Iradukunda.
Miss Elsa Iradukunda yabaye Nyampinga w’u Rwanda mu mwaka wa 2017. We yafashwe taliki 8, Gicurasi, 2022 mu gihe uwo bareganwa yafashwe taliki 10, Gicurasi, 2022 ni ukuvuga iminsi ibiri nyuma y’uko Iradukunda afashwe. Ubwo yafatwaga byavuzwe ko yabangamiye iperereza Ubugenzacyaha bwakoze kuri Ishimwe Dieudonnée uzwi nka Prince Kid nawe wari waramaze gutabwa muri yombi ndetse akaba yarakatiwe gufungwa iminsi 30 y’agateganyo.
Uyu yari umukunzi wa Miss Elsa Iradukunda nk’uko benshi babyemeza. Ishimwe we ubu yagejejwe mu rukiko aho akurikiranyweho ibyaha bifitanye isano n’ ihohotera rishingiye ku gitsina. Elsa Iradukunda agifatwa yabanje gufungirwa kuri station ya RIB i Remera.
The New Times yanditse ko ubushinjacyaha bwakiriye idosiye ya Elsa Iradukunda taliki 13, Gicurasi, 2022 burayisuzuma mbere yo kuyishyikiriza urukiko, akaba azarwitaba mu ntangiriro z’Icyumweru kizatangira kuri uyu wa 23, Gicurasi, 2022.
About The Author
