Amezi atanu arashize Umunyana Shanitah wegukanye ikamba rya Miss East Africa atarahabwa imodoka yatsindiye, ku mpamvu z’uko ‘habuze uyigura’.
Ijoro rya tariki 25 Ukuboza 2021, ryasize ibinezaneza mu mutima wa Umunyana Shanitah, kuko ari bwo yambitswe ikamba rya Miss East Africa ahigitse abo bari bahatanye.
Uyu mukobwa utuye Kabeza yageranye mu cyiciro cya nyuma n’abakobwa 16 bari bahagarariye ibihugu byabo birimo u Burundi, Tanzania, Uganda, Kenya, Ethiopia, Sudani y’Epfo n’ibindi. Aba bakobwa bari bamaze ukwezi mu mwiherero, bahabwa amahugurwa atandukanye.
Umunyana usanzwe ufite ikamba rya Miss Supranational Rwanda 2019, yagaragiwe na Queen Mugesi wo muri Tanzania wabaye igisonga cya mbere na Oceanne Rose ukomoka muri Île Maurice wabaye igisonga cya kabiri.
Igisonga cya mbere yahembwe amadorali 5000 angana n’amanyarwanda miliyoni eshanu naho igisonga cya Kabiri ahembwa amadorali 3000 angana n’amanyarwanda miliyoni eshatu.
Mu bihembo Umunyana Shanitah yatsindiye harimo umushahara wa buri kwezi ungana n’amadorali 1500 angana na miliyoni n’igice y’amanyarwanda, imodoka nshya ya Nissan xtrail 2021 ifite agaciro k’amadorali 44, 000 angana na miliyoni 40 z’amanyarwanda n’ibindi.
Gusa kugeza ubu amezi atanu arashize, uyu mukobwa atarahabwa iyi modoka. Visi-Perezida wa Miss East Africa, Miss Mutesi Jolly yabwiye Inyarwanda dukesha iyi nkuru ko amezi atanu ashize iyi modoka itarabona umuguzi, ari nayo mpamvu Umunyana atarayihabwa.
Ati “Turacyategereje ugura (Umuguzi). Iracyari muri Tanzania, itwarirwa mu ruhande rw’iburyo. Ntabwo yaza hano Imodoka.”
Hari gahunda y’uko iyi modoka izagurishwa, hanyuma amafaranga avuyemo ahabwe Miss Umunyana agure imodoka ashaka.
Umushinga wa Umunyana Shanitah ni uguteza imbere uburezi bw’umwana w’umukobwa, ariko akibanda cyane ku ikoranabuhanga.
About The Author
