Umuhanzi Massamba Intore wamamaye mu muziki nyarwanda by’umwihariko mu njyana gakondo, ashobora guhurira na Perezida Paul Kagame mu birori byo kwizihiza isabukuru y’umuhungu wa Perezida Yoweri Museveni, Lt Gen. Muhoozi Kainerugaba.
Tariki ya 16 Mata 2022, Gen. Kainerugaba yatangarije ku rubuga rwa Twitter ko Perezida Kagame yemeye kwitabira ibirori bye by’isabukuru. Ati: “Nejejwe cyane no gutangaza ko data wacu, umukomanda ukomeye, Perezida akanaba umuyobozi w’u Rwanda azitabira ibirori by’isabukuru yanjye y’amavuko. Imana ishimwe. Inkotanyi cyane rwose!”
Kuri uyu wa 18 Mata, uyu musirikare usanzwe ari Umugaba w’ingabo za Uganda zirwanira ku butaka, yemeje ko uyu muhanzi na we azaba ari muri ibi birori, agaragaza ko akumbuye kubyina indirimbo ye yitwa ‘Inkotanyi cyane’.
Yagize ati: “Nishimiye kubatangariza ko umuhanzi ukomeye mu Rwanda, Massamba Intore azadutaramira ku munsi wanjye w’amavuko. Nkumbuye kubyina indirimbo nkunda ‘Inkotanyi Cyane’.”
Ibi birori bizabera ku kibuga cya Lugogo Cricket Oval i Kampala tariki ya 23 Mata 2022. Ku munsi uzakurikiraho, abazabyitabira bazasangirira ifunguro ku biro by’Umukuru w’Igihugu, iki gikorwa kikazategurwa na Perezida Yoweri Museveni. Massamba Intore kandi azahuriramo n’abandi bahanzi bakomeye muri Uganda barimo Bebe Cool na Dr Jose Chameleone.
About The Author
